Qax və Şəkidə yol-nəqliyyat hadisələri baş verib. Qəzalardan biri xəsarətsiz ötüşsə də, digərində bir nəfər müxtəlif dərəcəli bədən xəsarətləri alıb.

Axşam saatlarında Qaxda yol nəqliyyat hadisəsi baş verib. Qəza nəticəsində sürücü müxtəlif bədən xəsarətləri alıb. Hadisə axşam saatlarında Yevlax-Zaqatala-Gürcüstan magistral yolunun 107-ci kilometrliyində, Qax rayonunun Şotavar kəndi ərazisindən keçən hissəsində baş verib. Qax rayonu, Almalı kənd sakini 45 yaşlı Elmir Əliyev sükan arxasında olduğu minik avtomobili ilə Almalı kəndindən Zaqatala rayonu istiqamətində hərəkətdə olarkən qarşısında gedən, hələ ki, sürücüsü məlum olmayan qoşqusu olan traktora arxadan çırpılıb. Müxtəlif bədən xəsarətləri alan Elmir Əliyev dərhal Təcili Tibbi Yardım maşını ilə Qax rayon Mərkəzi Xəstəxanasına çatdırılıb. Xəsarət alan sürücünün sözlərinə görə, normal sürətlə hərəkət etdiyi halda qarşısında arxa işıqları olmayan qoşqulu traktoru görməyib və əyləcə bassa da qəzadan xilas ola bilməyib. Qəzadan sonra traktorun sürücüsü nəqliyyat vasitəsi ilə birlikdə hadisə yerindən qaçıb.

Axşam saatlarında Şəki şəhərində də yol nəqliyyat hadisəsi baş verib. Şəki şəhər Sabit Rəhman küçəsində bazar istiqamətində hərəkət edən 40 yaşlı Elçin Əbdürəhmanova məxsus "Niva" markalı avtomobillə, əks istiqamətdə hərəkət edən, 26 yaşlı Rəvan Mustafayeva məxsus "VAZ 2106" markalı avtomobil toqquşub. Qəza nəticəsində hər iki avtomobilə xeyli ziyan dəyib. Xoşbəxtlikdən xəsarət alan olmayıb. Hələlik qəzanın dəqiq hansı səbəbdən baş verdiyi bilinmir.

Hər iki faktla bağlı araşdırmalar aparılır.

kepeztv.az