Qaxda yanğın baş verib. Hadisə nəticəsində fərdi yaşayış evi qismən, ona bitişik tikili isə tamamilə yanıb. Bakı və Qusarda da vətəndaşlara məxsus evlər yanaraq yararsız vəziyyətə düşüb.
Qaxın Marsan kəndində qeydə alınan hadisə zamanı kənd sakini Elsəvər İsaqova məxsus fərdi yaşayış evinə bitişik yardımçı tikili anidən alışıb. Alov qısa müddətdə genişlənərək yaşayış evinə keçib. Yanğın baş verən zaman evdəkilər hadisədən yalnız elektrik kəsiləndən sonra xəbər tutub. Yanğınsöndürənlər ora çatana qədər qonşular alovun qarşısını almaq üçün köməyə gəliblər. Hadisə yerinə Qax Yanğından Mühafizə Hissəsinin 3 yanğınsöndürən maşını və şəxsi heyəti cəlb olunub. Bütün cəhdlərə baxmayaraq yardımçı tikili tamamilə, yaşayış evinin isə çardaq hissəsi yanaraq yararsız vəziyyətə düşüb. Yanğının elektrik naqillərindəki qısaqapanmadan baş verdiyi ehtimal olunur. Ev sahibəsi yanğınsöndürənlərin gec gəldiyini, nəticədə alovun daha geniş ərazini əhatə etdiyini iddia edib.
Bakıda da yanğın hadisəsi qeydə alınıb. Nərimanov rayonunda doqquzmərtəbəli yaşayış binasının 9-cu mərtəbəsində vətəndaşa məxsus ümumi sahəsi 60 kv.m olan 3 otaqlı mənzilin mətbəxində 3 kv.m sahədə mətbəx mebeli və qaz sobası yanıb. İlkin ehtimala görə, bu hadisə də elektrik naqillərində qeydə alınan qısaqapanmadan baş verib.

Qusarda isə Köhnə Xudat kəndində vətəndaşa məxsus ümumi sahəsi 112 kv.m olan birmərtəbəli 3 otaq və aynabənddən ibarət evdə yanğın baş verib. Nəticədə evin 1 otağının, aynabəndinin və dam örtüyünün yanar konstruksiyaları 85 kv.m sahədə yanıb. Evin qalan hissəsi yanğından mühafizə olunub.

Artıq bütün faktlarla bağlı BDYMH-də araşdırmalara başlanılıb.

kepeztv/az