Bu gün vətəndaşların əksəriyyəti informasiyanı saytlardan əldə edir.

Lakin dövlət qurumlarına məxsus əksər saytlarda vaxtlı-vaxtında yenilənmə getmir. Halbuki dövlət saytları informasiya əldə etmək baxımından insanların işini asanlaşdırmalıdır. Ona görə də vaxtlı-vaxtında vətəndaşlar lazımi informasiya ilə təmin olunmalıdırlar. Apardığımız araşdırmalar göstərir ki, icra hakimiyyətlərinin saytlarının çoxunda yenilənmə gec-gec gedir. Ona görə də vətəndaşlar icra hakimiyyətlərinə məxsus saytlardan istənilən məlumatı əldə etməkdə çətinlik çəkirlər. Dövlət qurumlarına məxsus internet portallarının yenilənməsi təkcə sadə vətəndaşlar üçün deyil, eləcə də media nümayəndələri üçün də önəmlidir. Media işçiləri dövlət qurumlarının mətbuat katiblərinə istənilən anda çıxış imkanı tapa bilmədikləri zaman saytlardan istədikləri məlumatı əldə edə bilərlər. Lakin saytlar da lazımi informasiya ilə təmin olunmalıdırlar. Maraqlıdır ki, bəzi məmurlar billərəkdən informasiya xəsisliyi edirlər. Təkcə mətbuata çıxmaqla deyil, eyni zamanda onlara məxsus saytlara da lazımi informasiyanı yerləşdirməkdən qaçırlar. Bütün bunlar onu deməyə əsas verir ki, bəzi məmurlar həm mediadan, həm də vətəndaşlardan ona görə qaçırlar ki, üzərlərinə düşən öhdəlikləri vaxtlı-vaxtında yerinə yetirmirlər. İşlərinə qarşı məsuliyyətsizlik nümayiş etdirirlər. Ona görə də xalqa, mediaya hesabat verməkdən qorxurlar.

Bu səbədən də yerli icra hakimiyyətlərinin saytlarında informasiya göstəriciləri aşağı səviyyədədir. Burada informasiya texnologiyalarının tətbiqi yetərli deyil. Regionlarımızda elektron hökumət quruculuğu sahəsində vəziyyət hədsiz dərəcədə pisləşməyə doğru gedir.

Quba Rayon İcra Hakimiyyətinin saytı axırıncı dəfə 2015-05-09 tarixində yenilənib. Qusar rayonunun icra Hakimiyyətinə məxsus sayt 2015-06-01 tarixində yenilənib. Ağsu rayon İcra Hakimiyyətinə məxsus sayt 2015-09-17 tarixdə yenilənib. Şamaxı rayon İcra Hakimiyyətinə məxsus saytda 2015-09-18 tarixdə yenilənmə aparılıb. Qəbələ rayon İcra Hakimiyyətinə məxsus internet portalında sonuncu dəfə yenilənmə 2015-09-23 tarixdə həyata keçirilib. İsmayıllı rayon İcra Hakimiyyətinə məxsus sayt 2015-09-28 tarixdə yenilənib. Tovuz rayon İcra Hakimiyyətinə məxsus saytda 2015-06-23 tarixdə yenilənmə həyata keçirilib. Zaqatala rayon İcra Hakimiyyətinə məxsus sayt isə 2015-09-16 tarixdə yenilənib.

Qeyd edıək ki, saytların əksəriyyətində Elektron Xidmətlər bölməsi tamamilə boşdur. Xüsusilə də müsəlman dünyasında qeyd olunan Qurban bayramı barədə adlarını çəkdiyimiz saytların heç birində informasiya yerləşdirilmədi. Ola bilməz ki, rayon ərazisində sözügedən bayramla bağlı hansısa mərasim keçirilməyib. Lakin əksər rayon icra hakimiyyətlərinin saytlarında bu barədə bir dənə də olsun xəbər getməyib.

Yerli icra hakimiyyəti orqanlarının əksəriyyətinin saytları olsa da, onların çoxunun içərisində heç nə yoxdur. Bəzi məmurlar məqsədli şəkildə elektron xidmətlərə keçidə maraq göstərmir, hətta müxtəlif yollarla bu prosesə əngəl törədir, bilərəkdən və ya bilməyərəkdən prosesi gecikdirirlər. Odur ki, ilk öncə bu cür məmurlardan yaxa qurtarmaq gərəkdir.

Qeyd edək ki, ölkəmizdə "İnformasiya əldə etmək haqqında" Qanun, informasiya-kommunikasiya texnologiyaları ilə bağlı prezident sərəncamı olsa da, bir sıra dövlət qurumlarının saytı normal fəaliyyət göstərmir. İctimaiyyəti lazımi informasiya ilə təmin etmirlər. Ona görə də bu gün icra hakimiyyətlərinə məxsus saytlara daxil olan az adam tapılar. Sanki icra hakimiyyətlərinin başçıları formallıq xatirinə sayt açıblar.

Nəzər salsanız görərsiniz ki, icra hakimiyyətlərinə məxsus bütün saytlar bir-birinin təkrarıdır. Demək olar ki, dizayn eynidir. Elə bölmə də var ki, boşdur.