Ötən açıqlamalarımızda yazıb vurğulamışdıq ki, Xaçmazın SSİ-si bu gün daha çox israfçılığa, mənimsəmələrə yol açan bir idarədir. O məqama da toxunmuşduq ki, idarə rəhbərliyinin səhhətində əmələ gələn (əvvəla ona səhhətində əmələ gələn problemlərlə əlaqədar cansağlığı arzulayırıq) problemlər, rəhbərliyin mütəmadi olaraq iş başında tapılmamasına səbəb olan amildir. Elə bu kimi və digər səbəblər üzündəndir ki, idarənin qarşısında duran vəzifələrin çoxu yerinə yetirilmir və çoxsaylı problemlərin varlığı da daim qabarmaqda davam edir.
Rayondakı mənbəmiz bildirir ki, SSİ-nin rəisi cənab Vaqif Səlimovun xarakterik xüsusiyyəti, bəzən büdcədən ayrılan vəsaitlərin də kimlər tərfindənsə mənimsənilməsinə də səbəb olur. Çünki, o, həm xəstədir, həm də sakit təbiətli vəzifə sahibidir. Elə bu səbəbdən də, idarədə hər ay mənimsəmələrə yol verilir, israfçılığa qol qoyulur. Mənbə onu da qeyd edir ki, çox zaman idarənin balansında olan texnikadan, rayon sakinləri müəyyən danışıqlar və razılaşdırılmış qiymətin müqbilində də istifadə edirlər. Məsələn, traktorlardan, ekskvatorlardan və digər nəqliyyat vasitələrindən sakinlərin həyətlərində quyuların qazılmasında, çaykənarlarında əksər işlərin görülməsində, meşə zolaqlarında müəyyən məqsədlər üçün istifadə olunmasında və.s kimi işlərin görülməsində istifadə olunur. Bəli, bu zaman qazanan V.Səlimov olur, itirən isə onun rəhbərlik etdiyi idarə olur. İdarəyə ayrılan yanacağın, müəyyən ehtiyat hissələrinin də “həzmi-rabedən” keçirilməsi, cənab idarə rəisinə daha çox gəlir gətirməkdədir.
Diqqəti bir məqama da yönəltmək istəyirik ki, hələ bir müddət bundan idarədə yaşanan olaylar, bizim üçün də aktuallıq kəsb etdiyindən, rəhbərliyin ünvanına sorğu məktubu ünvanlamışdıq. Məqsədimiz idarəyə hər kvartal üçün ayrılan vəsaitin məbləği, verilən yanacağın miqdarı, ştat cədvəli üzrə işləyən işçilərin sayı və.s haqda məlumatları əldə etmək idi. Düzdür bu yöndə məlumatların əldə olunmasını, KİV nümayəndəsi olaraq əldə etmək ixtiyarına malik olsaq da, cənab Vaqif Səlimovun bürokratik idarəçiliyi, istəyimizi gerçəkləşdirməyə imkan vermədi. O halda bilib başa düşdük ki, yerli mənbənin informasiya mərkəzinə çatdırdığı məlumatlar həqiqətdir və Vaqif müəllimin həyata keçirdiyi idarəçilik demokratiyaya deyil, bürokratiyaya söykənir. Əgər bu belə olmasaydı, şəffaf idarəçilik həyata keçirilsəydi, o halda rəhbərliyin tapşırığı əsasında ünvanlanan suallarımıza da aydınlıq gətirilərdi.
Araşdırmamız davam edəcək.

Elmar