Ermənistan parlamentinin oktyabrın 6-da keçirilən iclasında hakim “Vətəndaş Müqaviləsi” Partiyası ilə müxalif “Güclü Ermənistan” blokunun deputatları arasında yaranan mübahisə qızışaraq davaya çevrilib.
Qarşıdurma “Güclü Ermənistan” müxalifət fraksiyasının deputatı Edqar Qazaryanın çıxışının parlamentin spikeri Ruben Rubinyan tərəfindən yarımçıq dayandırılmasından sonra baş verib.

E.Qazaryan spikerlə qısa mübahisədən sonra tribunadan düşərək yerinə keçib. Bu zaman hakim “Vətəndaş müqaviləsi” fraksiyasının deputatı Vahe Qalumyan onun yanına yaxınlaşaraq mübahisəni davam etdirmək istəyib.
E.Qazaryanın fraksiya həmkarı Vazinak Vartanov Qalumyanın qarşısını kəsib. Bundan sonra deputatlar arasında qarşıdurma yaranıb və insidentə digər parlament üzvləri də qoşulub.

Spiker iclasda fasilə elan etməyə məcbur olub.

Qeyd edək ki, parlamentin gündəliyinə Erməni Apostol Müqəddəs Kilsəsinin fəaliyyəti ilə bağlı qanun layihəsinin müzakirəsi daxil edilib. Müxalifət layihəni konstitusiyaya zidd hesab edir.