İranın mərhum ali lideri Əli Xamenei ölümündən əvvəl ölkənin nüvə proqramı ilə bağlı mövqeyini yumşaltmışdı.

CNN xəbər verir ki, bunu Donald Tramp administrasiyasında terrorla mübarizə üzrə keçmiş rəhbər Co Kent bildirib.

“Bilirsiniz, mən keçmiş ali lider Əli Xameneinin tərəfdarı deyiləm, amma o, onların nüvə proqramını nəzarətdə saxlayırdı. Onlara nüvə silahı əldə etməyə imkan vermirdi”, – deyə Kent istefasından sonra ilk müsahibəsində keçmiş "Fox News" aparıcısı və nüfuzlu mühafizəkar podkastçı Taker Karlsona bildirib.

“Əgər siz onu aradan götürsəniz, əgər onu öldürsəniz, aqressiv hərəkət etsəniz, insanlar bu rejimin ətrafında birləşəcək”, – deyə Kent əlavə edib.

Karlsonun İranın nüvə silahı əldə etməyə yaxın olub-olmadığı sualına Kent belə cavab verib: “Xeyr, deyildilər”. O əlavə edib ki, İranın strategiyası “nüvə proqramından tam imtina etməmək” olub.

Xatırladaq ki, ABŞ-nin Milli Terrorla Mübarizə Mərkəzinin keçmiş rəhbəri Cozef Kent 17 martda ABŞ və İsrailin İrana qarşı əməliyyatı fonunda istefa verib.