Qazax rayon İcra Hakimiyyətindən gələn şikayətlərin ard-arası kəsilmir.
Azerinfo.az jam.az-a istinadən xəbər verir ki, Rayonun Ağköynək kənd sakini, 2-ci qrup hərbi əlil, istefada olan gizir Tural Mürşüdov icra orqanının ona qarşı qərəzli münasibətindən gileylidir. O, Qarabağ müharibəsi əlillərinə verilən imtiyazdan məhrum olduğunu bildirir. Veteran mənzil növbəsinə yazıldığını, lakin icra hakimiyyətinin əsassız bəhanələrlə onu qeydiyyata almaqdan imtina etdiyini iddia edir: “Xidməti vəzifələrimi yerinə yetirərkən əlil olmuşam və imtiyazlarım Qarabağ müharibə əlilərinə bərabərdir. Belə ki, mən 2-ci qrup əlil kimi Qazax rayon İcra Hakimiyyətində birinci növbəli mənzil qeydiyatına götürülməli və mənzillə təmin olunmalıyam. Məni 07.01.2015-ci ildə Qazax rayon icra hakimiyyətinə çağırdılar və məndən mənzilimdə otaqların sayı və sair ağıla sığmayan sənədlər tələb etdilər. Mən sənədləri toplayıb 18.02.2015-ci il tarixdə Qazax rayon İcra Hakimiyyətinə göndərdim. Bir neçə gün öncə isə Qazax rayon İcra Hakimiyyəti başçısının müavini Tahir Musayev məni qəbula çağırdı və bildirdi ki, “Sən Qarabağ müharibə əlili deyilsən, sənə güzəştli şərtlərlə ev təminatı növbəsi aid deyil”. Məmurların prezidentin sərəncamından bixəbər olduğunu deyən veteran T.Musayevin onu get-gələ saldığını, özünü öldürmə həddinə çatdırdığını deyir: “Bildirmək istəyirəm ki, prezidentin sərəncamında göstərilib ki, xidməti vəzifələrini yerinə yetirərkən əlil olmuş şəxslərin statusu Qarabağ müharibə əlillərinə bərabərdir. Lakin Qazax rayon İcra Hakimiyyətinin səlahiyyətlilərinin bundan xəbəri yoxdur. Səbəbi bilinmir ki, nə üçün yarı can əlili növbəyə götürməyib başıma oyun açırlar? Tahir Musayev məni o həddə çatdırıb ki, az qalır ki, özümə qəsd edim. Artıq mən bu həyatdan bezmişəm”.