Adətən eşidib görmüşük ki, bəyənatı rəsmi dövlət qurumları, beynəlxalq təşkilatlar və onların səlahiyyət verdiyi vəzifəli şəxslər səsləndirmək, rəsmi qaydada elan etmək hüququna malik olurlar. Amma, Tovuz TSEK-nın bugünkü sədri də, deyəsən belə bir ixtiyara sahib olmaq eşqinə düşüb. Çünki, həmin qurum haqda işıq üzü görən tənqidi açıqlamalarımızdan, ictimaiyyətin diqqətinə çatdırdığımız bəzi məqamlardan sonra o da bəlli oldu ki, həqiqətən də Arif həkim zaman-zaman “arif” addımlarını atmaqda davam edib. Məsələn, o, sahib olduğu vəzifəyə yiyələndikdən sonra, əksər TSEK-nın sədrlərindən fərqli olaraq, Tovuz avtovağzalında özü üçün “mini filial” da açmışdı. Və həmin “filial”da səlahiyyət sahibliyini, avtovağzalda “dispeçer” vəzifəsini daşıyan Akif adlı şəxsə həvalə etmişdi. Başlıca məqsədi o idi ki, fəaliyyətinin qaranlıq məqamlarını mətbuat səhifələrinə çıxarmaq istəyən KİV nümayəndələrini, Akif adlı şəxsə verdiyi qəpik-quruşla susdura bilsin. Bəli o, bir müddət belə bir istəyinə nail olsa da, amma atdığı sonrakı addımlar zaman keçdikcə əks effekt verməyə başladı. Nəticədə Arif həkim, bir müddət bundan əvvəl fəaliyyətə başlaıyan “mini filial”ının fəaliyyətini “dondurmağa” məcbur oldu.
TSEK sədrinin digər bir addımı isə, əldə etdiyi “qəpik-quruşu” iş otağında deyil, informasiya mərkəzimizə daxil olan məlumatlara görə rayonun Qaraxanbəyli kəndinə gedən yolun kənarındakı kafedə almasıdır. Yəni, Arif həkimin atdığı “arif” addımlardan biri də odur ki, o, aldığı “qəpik-quruşları” komissiya üzvlüyündə çalışan həkimlərdən birinin vasitəsilə əldə edir. Bu haqda kifayət qədər məlumatlara malik olan mənbə onu da bildirir ki, sədr başda olmaqla komissiya üzvləri, arabir “müdrik” addımlarını da atmağı bacarırlar. Məsələn, bir kimsə əllillik statusuna sahib olmaq istəyərsə, mütləq Arif həkimin “bığ”ının altından “keçməyə” məcbur olur və çox keçmir ki, həmin şəxs niyyətini də “çin” etməyi bacarır. Əldə etdiyimiz digər məlumatlara görə, təkcə rayonun Mülkülü kəndində bir neçə nəfər kənd sakini, komissiya üzvlərinin “humanist”liyi sayəsində belə bir ixtiyara sahib olublar.
Maraqlı məqam odur ki, TSEK-nın sədri belə bir məsələlərdə özünü heç cür günahkar hesab etmir və kəskin “bəyənat” verərək “mənim haqqımda yazan hər kəsi, o cümlədən sizi də prokurorluğa verəcəyəm” deməklə, hədə-qorxu gəlməkdən belə çəkinmir. Hətta bu azmış kimi, ona bağlı olduğu (ola bilər ki, qohumu olsun) ehtimal olunan hüquqşunasın da, hüquqi köməkliyindən yararlanmağa çalışır. Amma bilib başa düşmür ki, cənab Səlim Müslümov bu cür “bəyənat”lar verən TSEK-sı sədrlərinin çoxuna, zaman-zaman “yaxşı yol” deyib. Çünki, rəhbərlik etdiyi strukturda maxinasiyaların baş qaldırmasına heç cür imkan verməyən S.Müslümov, bu gün çalışır ki, ona göstərilən etimadı doğrultsun. Bu belə olduğu halda, görəsən Arif həkimin səsləndirdiyi “arif bəyənatlar”a nə ad vermək olar?
Hörmətli oxucular! Növbəti açıqlamamızda sizləri daha müfəssəl məlumatlarla məlumatlandırmağa çalışacağıq.
Elmar