İlqar Rəfiyev: «Bu gündən sabaha yaşamaq ümidim yoxdur»

İlqar Rəfiyev 2-ci qrup Qarabağ əlilidir. Hazırda heç bir yerdə işləmir. 18 il Azərbaycan Silahlı Qüvvələrində xidmət edib. Amma indiyə qədər mənzillə təmin olunmayıb. Azerinfo.az JAM.AZ-a istinadən xəbər verir ki, 4 ailə üzvü ilə birlikdə qardaşının himayəsində yaşayan Şəki sakini mənzilin kiçik olması səbəbindən iki ailənin orada məskunlaşmasından əziyyət çəkdiklərini deyir.

İlqar Rəfiyev bildirir ki, dəfələrlə Şəki İcra Hakimiyyətinə mənzil problemi ilə bağlı müraciət etsə də, faydası olmayıb. Onu yalnız Qarabağ əlili kimi ev qeydiyyatına alıblar. «Mən adi insanlar kimi yox, Qarabağ əlili olaraq bu gündən sabaha yaşamaq ümüdüm yoxdur. Çünki Azərbaycanın ərazi bütövlüyü uğrunda gedən döyüşlərdə aldığım xəsarətlərdən ağır xəstəyəm. Dövlət başçısından xahiş edirəm ki, mənim mənzil problemimi həll etməyə yardım göstərsin».