Asfalt zavodunun direktoru Raqib adlı şəxsdən külli miqdarda pul tələb edildiyinə dair iddialar var

Dünən Lənkəran Şəhər Rayon Polis Şöbəsi «əməliyyat» keçirərək, rayonun ən tanınmış iş adamlarından birini həbs edib. Azerinfo.az-ın JAM.AZ-a istinadən yaydığı məlumata görə, Raqib adlı həmin iş adamı Cənub bölgəsindəki ən iri asfalt zavodlarından birinin direktoru işləyir.

Lənkəranda gəzən söz-söhbətə görə, polis rəisi Möhübbət Hüseynov və şəhər prokurorunun birgə qurduğu «əməliyyat»ın məqsədi heç də zavod direktorunu həbsə göndərmək deyil. Əksinə, Raqib adlı iş adamından külli miqdarda pul istənildiyinə dair söhbətlər dolaşır. İddia edilir ki, guya, polis rəisi adıkeçən sahibkardan külli miqdarda pul müqabilində azadlığa buraxılacağını deyib.

Rayondan aldığımız məlumata görə, həbs olunan Raqib həqiqətən də maddi imkan baxımından ölkənin ən sayılıb, seçilənləri sırasındadır. Üstəlik, onun qurduğu iş bölgədə rəqabətədavamlılığı ilə də ad çıxarıb. Çünki bir müddət əvvəl Lənkəranda istifadəyə verilən Gilan Asfalt Zavodu fəaliyyət göstərsə də, bunun Raqibin zavoduna heç bir təsiri olmayıb. Halbuki regiondakı əksər asfalt zavodları rəqabətə dözməyib, sıradan çıxıb.

JAM.AZ-a verilən məlumatda o da deyilir ki, Raqibə qarşı konkret olaraq hansı ittihamın irəli sürüldüyü də məlum deyil. Ehtimal edilir ki, Raqibi həbsdə saxlamaq üçün heç də kiçik «cinayət»lərdən istifadə olunmayacaq. Bunun üçün daha tutarlı «əsas» yaradılacaq.

Lənkəran camaatı bu olayı maraqlı bir şəkildə ifadə edir: «Polis rəisi Möhübbət Hüseynovun toruna qızıl balıq düşüb».