Cari ilin sentyabr ayında əhali Əmək və Əhalinin Sosial Müdafiəsi Nazirliyinin (ƏƏSMN) “Elektron hökumət” portalı üzərindən təqdim etdiyi elektron xidmətlərdən ümumilikdə 236 714 dəfə faydalanıb ki, bu da portaldakı bütün e-xidmətlərdən ümumi istifadənin (767 616 ədəd) 30,8%-ni təşkil edir.

Nazirliyin İctimaiyyətlə əlaqələr şöbəsindən “APA-Economics”ə verilən məlumata görə, ötən ay nazirliyin e-xidmətlərindən yararlananların sayı əvvəlki avqust ayı ilə müqayisədə 58%-ə yaxın artıb.

Sentyabr ayında ƏƏSMN-nin “Əmək müqaviləsi bildirişlərinin qeydiyyata alınması və bu barədə işəgötürənə məlumatın verilməsi” e-xidməti 130 352 ədəd, “Əmək müqaviləsi bildirişləri barədə məlumatların işçilər tərəfindən əldə edilməsi” e-xidməti 81 118 ədəd istifadə sayı ilə əhalinin ən çox faydalandığı e-xidmətlər sırasında ilk üçlükdə qərarlaşıblar. Nazirliyin “İş yerinə dair arayış” e-xidməti də həmin sırada yer alıb və ötən ay “E-hökumət” portalında 9 növ e-arayış xidmətindən cəmi istifadənin 54%-i, yəni 22 856-ı məhz ƏƏSMN-nin bu e-xidmətinə aid olub.

Ümumilikdə, cari ilin 9 ayında əhali ƏƏSMN-nin bütün elektron xidmətlərindən 1 mln. 660 min 824 dəfə istifadə edib ki, bu da qeyd olunan dövrdə “e-hökumət” portalı üzrə ümumi istifadə sayının 17,5%-ni təşkil edir.