“Pünhan Mütəllimovun işinə qaytarması məsələsinə baxa bilər”.

Şabran sakini Pünhan Mütəllimov “Azərbaycan Dəmir Yolları” QSC-nin tabeliyində olan idarə tərəfindən işdən azad olunub.

ANS TV-nin məlumatına görə, Pünhan Mütəllimov hazırda Şabranın Ağalıq kəndindəki ata evində iki uşağı və həyat yoldaşı ilə birlikdə yaşayır.

O, 2009-cu ildən maşinist işlədiyi “Azərbaycan Dəmir Yolları” QSC-nin Sumqayıtın H.Z.Tağıyev qəsəbəsindəki Dəmir Yollarının və Texniki Qurğularının Təmir-Tikinti Departamenti tərəfindən işdən azad edildiyini deyir.

İşdən azad olunması barədə qurumun rəhbəri Çingiz Məmmədovdan may və iyil aylarında iki dəfə bildiriş də gəlib və avqustun 23-dən ona işə çıxmağa icazə verilməyib.

Pünhan Mütəllimov bildirdi ki, departamentdən ona işə qayıdaçağı vəd olunmuşdu:

“Departamentdən ixtisara düşməyim barədə xəbərdarlıq məktubu gəlib. Amma departament mənim işə qayıdaçağım barədə vəd vermişdi”.

Şikayətçinin sözlərinə görə, işlədiyi zaman H.Z.Tağıyev qəsəbəsində kirayədə yaşayıb. İxtisara düşəndən sonra ata evinə dönüb. Amma ailə böyük olduğundan burda yaşamaq çox çətindir.

Üçüncü övladını gözləyən və işsizlikdən ata evinə güclə sığınan Pünhan Mütəllimovun şikayyətini “Azərbaycan Dəmir Yolları” QSC-nin mətbuat xidmətinin rəhbəri Nadir Əzməmmədovun diqqətinə çatdırdıq.

Nadir Əzməmmədov isə öz növbəsində Pünhan Mütəllimovun şikayətini sözügedən departamamenti rəhbəri Çingiz Məmmədova çatdırıb. Onun deməsinə görə işin həcmi azaldığına görə, Pünhan Mütəllimov və daha bir neçə nəfər işdən ixtisarla azad ediliblər. Hələlik qurumda həmin işçilərə ehtiyac yoxdu.

Nadir Əzməmmədov Çingiz Məmmədova istinadən onu da bildirdi ki, gələcəkdə Pünhan Mütəllimovun işinə qaytarması məsələsinə baxıla bilər.