Dövlət Statistika Komitəsinin bu ilin 9 ayı ərzində çıxardığı statistik göstəricilərə əsasən ölkə əhalisinin sayı 9 milyon 593 min nəfər olub. Gəncədə bu müddət ərzində olan nəticələrə nəzər salsaq, bu say 330 214 nəfərdir. Ötən illə müqayisədə ümumi sayda azalma müşahidə olunub. Səbəblər çox olsa da, əsas səbəb selektiv abortlardır.

Əvvəllər Azərbaycanda cins nisbətində qızlar üstünlük təşkil edirdisə, son illər bu nisbət oğlanların xeyrinə dəyişib. Nəzərəçarpan dəyişiklik özünü 25 yaşlı əhali arasında daha çox biruzə verir. Səbəb cinsi selektiv abortlardır. Bu da valideynlərin qız və oğlan övladı arasındakı ayrı-seçkiliyindən yaranır. Və çox təəssüflər olsun ki, bu hala bölgələrdə daha çox rast gəlinir.

Raya Məmmədova- ginekoloq "Qadınların cins seçməsi bizi narahat edən əsas məsələdir. Ailələr çalışırlar ki, övladları oğlan olsun. Oğlan əvəzinə qız olduqda onu süni surətdə pozmağa cəhd edirlər. Bu da son vaxtlar oğlanların qızlardan çox olmasına gətirib çıxarıb. Belə çıxır ki, bizim oğlanlarımız kimlə evlənəcək?!"

Bu il ərzində Gəncədə doğulan uşaqların sayı 3329 olub. Faiz nisbətinə gəlincə 48,6% qızların, 51,4% isə oğlanların payına düşür. Qeyd edək ki, dünyaya gələn uşaqların cinsinə görə nisbətin pozulması göstəricilərinə əsasən, Azərbaycan dünyada ikinci yerdədir.

Amma qız-oğlan fərq etməz, əsas övlad payından düşən sevincdir. Unutmayın ki, sizin cinsinə görə imtina etdiyiniz körpələrə illərdir həsrət qalanlar var...

http://kepeztv.az