Həkimlər xəbərdarlıq edir! Məktəbli çantaları ağır çəkisi ilə şagirdlərin sağlamlığını əlindən alır. Ağır çantalar hansı xəstəliklərə yol aça, uşaqların fiziki görünüşündə nə kimi problemlərə gətirib çıxara bilər? Suallara qarşıdakı materialda cavab tapmağa çalışacağıq.

Son zamanlar azyaşlılar arasında skalioz xəstəliyinin artması müşahidə olunur. Bunun da başlıca səbəblərindən biri məktəbli çantalarının həddindən artıq ağır olmasıdır.

Araşdırmamız zamanı məktəbdən çıxan bir şagirdin çantasının ağırlığını ölçdük, 3 kq-a yaxın oldu. Bu isə şübhəsiz ki, uşaq üçün qat-qat ağırdır. Bu da onu göstərir ki, uşaqların çantalarının ağırlığı onlarda gələcəkdə bir çox problemlərə yol açacaq.

Uşaqlarda qamət məhz 4-10 yaşlarında formalaşır. Ağır çantaların daşınması isə istər-istəməz onurğa sütununun böyüməsinə və əyilməsinə səbəb olur. Həkimlər çantaların öz çəkisinin 700 qramdan artıq olmamasını tövsiyyə edirlər.

Mehman Hüseynov- 1-saylı Uşaq Poliklinikasının tramvatoloq-ortopedi: "Əsasən ibtidai sinif şagirdlərinə arxadan, yəni ranits şəklində arxadan asılma çantaların daşınması məsləhət görülür. Axır zamanlar həqiqətən bizim müşahidələrimiz bunu göstərir ki, şagirdlər çox ağır çantalar daşıyırlar. Valideynlərin özlərinin onlara kömək etməyi məsləhət görülür".

Valideyinlərlə yanaşı bu məsələni müəllimlər də nəzarətdə saxlamalıdırlar.

Mehman Hüseynov- 1-saylı Uşaq Poliklinikasının tramvatoloq-ortopedi: "Onların azyaşlı şagirdlərin oturuşuna diqqət yetirmələri, vaxtaşırı əyilib-qalxma hərəkətləri etdirmələri məsləhət görülür. Bu hərəkətlər onların əzələlərinin inkişafına müsbət təsir göstərəcək".

Mütəxəssislərin sözlərinə görə, valideynlər uşaqlara məktəbli çantası seçərkən, asqısı geniş və tarazlaşdırıla bilən, sərt olmayan çantalar almalıdırlar. Bu, çiyinlər arasındakı yükün bərabər bölüşdürülməsinə kömək edir.

http://kepeztv.az/