Yay mövsümünün gəlişi Göygöl rayonu ərazisində yerləşən istirahət məkanlarına üz tutanların sayının artmasına səbəb olub. Buraya gələnlər iaşə obyektlərinin xidmətlərindən istifadə etməklə yanaşı, çay kənarında ailəvi dincələməyə də üstünlük verirlər. Bəs görəsən insanların təbiətlə təması ərazinin ekoloji tarazlığına nə dərəcədə mənfi təsir göstərir? Mövzunu əməkdaşımız Xaliq Qurbanlı araşdırıb.

Mövsüm ərzində minlərlə insanın üz tutduğu məkanlardan biri də Göygöl rayonunun Toğanalı və Çaykənd kəndləri ərazisində yerləşən istirahət mərkəzləridir. Əsrarəngiz təbiətə malik ərazi Gəncə şəhəri ilə yanaşı, digər rayonların sakinlərini və əcnəbiləri də özünə cəlb edir. Gün ərzində təxminən 1000-ə yaxın isanın istirahət etdiyi məkan ekoloji cəhətdən korlanmağa doğru gedir. Xüsusilə də Kürəkçay çayının ətrafı qida və məişət tullantıları ilə çirkləndirilir. 13 saylı Ekologiya və Təbii Sərvətlər Şöbəsinin əməkdaşı Həsən Məmmədovun sözlərinə görə, mütəmadi olaraq maarifləndirici və inzibati tədbirlər aparılmasına baxmayaraq, bəzi insanlar istirahət zamanı meşə massivini və çay kənarını zibilləyirlər. Bu da ərazidə xoşagəlməz görüntü yaratmaqla yanaşı, ətrafın çirklənməsi deməkdir.

Həsən Məmmədov - 13 saylı Ərazi Ekologiya və Təbii Sərvətlər Şöbəsinin əməkdaşı: "Ərazidə istənilən adam ailəsilə dincəlir. Ancaq apardığımız müşahidələr göstərir ki, əksər hallarda vətəndaşlar yemək qalıqlarını hara gəldi atırlar. Şüşə qablarını, bərk tullantıları çaya atırlar. Biz də ekoloq olaraq bu kimi insanlarla təbliğat söhbətləri aparırıq. Lazım gəldikdə inzibatı qaydada məsuliyyətə cəlb edirik".

13 saylı Ərazi Ekologiya və Təbii Sərvətlər Şöbəsindən o da bildirilib ki, əraziyə istirahət məqsədilə gələrkən çayda çimməsinlər. Çünki bu çayın suyundan ətraf kəndlərin sakinləri içmək üçün istifadə edir.

Öz rahatlığımızı düşünüb istirahət edərkən ekoloji təmizliyə də diqqət yetirməliyik. Ətraf mühiti qorumaq hər bir insanın mənəvi borcudur.

http://kepeztv.az