Ölkədə yoxsulluğun səviyyəsinin azadılması eləcə də aztəminatlı ailələrin rifah halının yaxşılaşdırılması üçün ölkəmizdə yoxsul ailələrə Ünvanlı Dövlət Sosial Yardımı verilir. Yardım alan ailələr isə qanunvericiliyə uyğun olaraq müxtəlif sənədlər hazırlayırlar. Rayonda yaşayan vətəndaşlar şəhərdəkilərdən fərqli sənədlər təqdim edirlər. Bəs bunlar hansı sənədlərdi və nə ilə əlaqədardı? Daşkəsən rayon Əhalinin Sosial Müdafiə Mərkəzindən verilən məlumata görə, şəffaflığın təmin edilməsi, neqativ halların aradan qaldırılması və nəzarət mexanizminin gücləndirilməsi sahəsində aparılmış işlər nəticəsində 2014-cü ilin yola saldığımız 10 ayı ərzində ünvanlı yardım təyin olunmuş ailələrin sayı azalıb. Bu 2013-cü ilin müvafiq dövrü ilə müqayisədə 20 faiz aşağıdır. Rayon üzrə hazırda 965 ünvanlı sosial yardım alan ailə qeydiyyata alınıb. Onların sayı 3725 nəfərdi.

Ülfət Əhmədov- Daşkəsən rayon Əhalinin Sosial Müdafiə Mərkəzinin direktoru: "Ünvanlı sosial yardımdan imtina üçün qanunvericilikdə nəzərdə tutulmuş hallar var. Biz dərhal onu yerində yoxlayırıq. Komissiya təşkil edilir. Bu gün də onun nəticəsidir ki, ünvanlı sosial yardımla bağlı müraciətlər azalmaqdadır".
Bundan başqa Ünvanlı Dövlət Sosial Yardım haqqında qanuna uyğun olaraq rayonun kəndlərindən yardım alan ailələr əlavə sənədlər də təqdim etməlidirlər.

Ülfət Əhmədov- Daşkəsən rayon Əhalinin Sosial Müdafiə Mərkəzinin direktoru: "Onlar yaşayış yerlərindən arayışlardı. Ailə üzvləri bir nəfər özlərinin təşəbbüsü ilə ailə başçısı seçir və notarial qaydada təsdiq olunur. Torpaqdan götürülən gəlir, mal-qarası varsa mal-qaradan gələn gəlir hesablanır və bundan sonra az təminatlı ailəyə ünvanlı yardım təyin olunur ".

Respublikamızda ünvanlı dövlət sosial yardımlar 2006-cı ildən ölkə başçısının sərəncamı ilə az təminatlı ailələrə verilir.

http://kepeztv.az/