"Gəncə kimi böyük şəhərdə belə problemlər olmamalıdır"

Gəncə şəhərində köhnə Nizami kinoteatrının arxa hissəsində yerləşən Vatutin küçəsinə 2 həftədən çoxdur ki, qaz verilmir.

Adıçəkilən küçənin sakinlərinin ANS PRESS-ə verdiyi məlumata görə, 15 gündür ki, evlərə ya qaz verilmir, ya da elə verilir ki, nəinki evləri qızdırmaq, heç yemək bişirmək də mümkün deyil.

Sakinlər deyir ki, Vatutin küçəsində bir çoxlarının evi ikimərtəbəlidir. Birinci mərtəbəyə cüzi miqdarda qaz gəlsə də ikinci mərtəbəyə qaz ümumiyyətlə gəlmir.
"Bəlkə bəzilərinin mətbəxi 2-ci mərtəbədədir. İndi neynəsin yemək bişirməsinlər. Bu küçədə 200-dən çox ailə yaşayır. Qazı elə verirlər ki, kibrit ondan güclü yanır. "Smart-kart" tipli sayğaclar quraşdırdılar. Pulumuzu vururuq, amma qaz gəlmir. Gəncə kimi böyük şəhərdə belə problemlər olmamalıdır", deyə sakinlər bildirir.

Sakinlər Gəncə şəhər Qaz İstismar İdarəsinə də müraciət ediblər. İdarədən isə bildiriblər ki, hələ qış rejiminə keçilmədiyi üçün qaz az miqdarda verilir.

Sakinlər isə İdarənin bu açıqlamasından narazıdılar.
"Allah üzümüzə baxıb ki, havalar xoş keçir. Birdən soyuqlar tez düşsəydi, ona necə olacaqdı. Yeməyi qızdıra bilmirik, evi necə qızdıracaqdıq", deyə sakinlər bildirir.

Qeyd edək ki, bir neçə həftə əvvəl şəhərin Təbriz küçəsinin sakinləri də qazın verilməməsindən şikayət etmişdilər.

Mövzunu davam etdirəcəyik.