Nizami rayonu, metronun "Neftçilər" stansiyanın yaxınlığı, Rüstəm Rüstəmov küçəsi uzun müddətdir ki, təmir edilməyi gözləyir.

Məsələ burasındadır ki, yolun 1 kilometrlik məsafəsinin asfalt örtüyü 4-5 ay öncə ağır texnika vasitəsi ilə qaşınıb. Ancaq yol hələ də təmir olunmayıb. Bu vəziyyət sürücülərin haqlı narazılığına səbəb olub.
Küçənin bu vəziyyətdə olması yoldan mütəmadi istifadə edən sürücüləri əlavə xərcə salır. Çünki qaşınmış asfaltdan geridə qalan hissə avtomobillərin təkərlərinin vaxtından əvvəl sıradan çıxmasına səbəb olur.
Sürücülər deyirlər ki, yolda olan çalalara bir dəfə "Azəravtoyol" ASC-nin əməkdaşları yamaq vurublar. Bəzilərini isə özləri doldurublar ki, həm maşınları dağılmasın, həm də üzərlərinə su sıçramasın: "Bu yol daimi işləkdir. Bakının Qaraçuxur, Bakıxanov kimi qəsəbələrinə buradan marşrutlar gedir. Bu yoldan istifadə edənlər avtomatik olaraq sürəti azaldırlar. Bu da tıxacın yaranmasına səbəb olur (Çəkiliş zamanı buna biz də şahid olduq-müəlıif).
Üstəlik toz-torpaq ətrafı bürüyür. Biz taksi sürücüsüyük. Bir müddət öncə burada taksi dayanacağı işarəsini qoydular. Sonra isə söküb, apardılar. Səbəbini soruşanda isə dedilər ki, "Daha yaxşısını, işıqlı olanını gətirəcəyik". Hələ də gətirməyiblər. Ad olur ki, biz kiməsə mane oluruq. Tıxac yaradırıq. Yolu təmir etsələr, burada tıxac olmaz".
Narazı olan təkcə sürücülər deyil, həm də sərnişinlərdir: "Bir neçə gündür ki, başlayıblar, səkiləri sökməyə... Hər tərəfə də kərpicləri atıblar. Sökə-sökə gedirlər. Daş piltələrin bir topasını da düz dayanacağın qarşısına atıblar. Avtobus buraya yaxınlaşa bilmir. Dayanır, yolun ortasında... Bu da bizim üçün təhlükəlidir. Dayanacağa girə bilməyən marşrut sürücüləri dalaşırlar. Aləm dəyir, bir-birinə... Biz də evimizə bu vəziyyətdə gedirik".

Məsələ ilə bağlı ''Azəravtoyol'' Açıq Səhmdar Cəmiyyəti ilə əlaqə saxladıq. Məlum oldu ki, bu qurum artıq təmir işlərinə başlayıb.

Qurumun sözçüsü Anar Nəcəfli artıq bu problemin aradan qaldırılması istiqamətində “Azəravtoyol” ASC tərəfindən işlərə başlandığını bildirdi: "Nizami rayonundakı Rüstəm Rüstəmov küçəsi uzun müddətdir ki, təmir olunmadığı üçün avtonəqliyyat vasitələrinin rahat və maneəsiz şəkildə hərəkətində çətinliklər yaranırdı. Artıq bu problemin aradan qaldırılması istiqamətində “Azəravtoyol” Açıq Səhmdar Cəmiyyəti tərəfindən işlərə başlanılıb. Uzunluğu 3.7 km. ( 1.85 km. x 2 ), eni isə 27,5 metr olan küçədə təmir-tikinti işlərinə start verilib. Küçə hər bir istiqamətə 2 olmaqla, 4 hərəkət zolağından ibarətdir.

Təmir-tikinti işləri çərçivəsində hazırda küçəboyu köhnə səki daşlarının sökülməsi işləri aparılır. Söküntü işləri yekunlaşandan sonra küçəyə 8 min p/m yeni səki daşının düzülməsi və köhnə asfalt-beton örtüyünün üst qatının qaşınaraq, yenisi ilə əvəzlənməsi işləri həyata keçiriləcək. Ümumilikdə küçənin 100 min kvadratmetrdən çox hissəsinin asfaltlanması nəzərdə tutulub".
A.Nəcəfli bildirdi ki, yoldan səth sularının kənarlaşdırılması üçün nəzərdə tutulmuş mövcud yağış-kanalizasiya sistemi tam işlək vəziyyətə salınacaq: "Yağış barmaqlıqları yenilənəcək, kommunikasiya xətlərinin dəmir-beton plitələri qaldırılaraq, yeni baxış qapaqları qoyulacaq. Vətəndaşların rahat və təhlükəsiz şəkildə hərəkətini təmin etmək məqsədi ilə mövcud piyada səkiləri bərpa olunaraq asfaltlanacaq.
Qeyd edim ki, Rüstəm Rüstəmov küçəsi Mikayıl Əliyev küçəsi ilə kəsişmədən başlayaraq, Bəkir Çobanzadə küçəsi və Qara Qarayev prospektlərindən keçərək, Sabunçu rayonu Ramiz Qəmbərov küçəsinədək ( Bakıxanov qəsəbəsinə düşən yol) uzanır. Bir sözlə, Rüstəm Rüstəmov küçəsi avtonəqliyyat vasitələrinin intensiv hərəkət etdiyi ərazidə yerləşməklə mühüm əhəmiyyətə malik küçələrdən biridir".




Musavat.com,