AzTU-nun əməkdaşı Polşadan ezamiyyətdən qayıdıb

Bu günlərdə AzTU-nun əməkdaşı, “Ziya” qəzetinin və Zim.Az saytının baş redaktoru Müşfiq Borçalı Polşada elmi ezamiyyətdə olmuşdur. O, Azərbaycanın Polşadakı səfirliyi və Varşava Dövlət Universitetinin təşkilatçılığı ilə keçirilmiş Azərbaycan-Polşa IV Beynəlxalq elmi konfran-sında iştirak etmiş və konfransın “Dilçilik və Ədəbiyyat” bölməsində elmi məruzə ilə çıxış etmişdir.
Səfər zamanı M.Borçalı Polşa Elmlər Akademiyasında, Ədəbi Tədqiqatlar İnstitutunda, Varşava Dövət Universitetində, Varşava Texniki Universitetində, Varşava Poliqrafiya Məktəbində və Azərbaycanın Polşadakı səfirliyində olmuş, həmçinin Polşada Azərabycanlı Gənclər Şurasının üzvləri ilə görüşmüşdür.
Görüşlərdə o, təmsil etdiyi ali təhsil müəssisəsi - Azərbaycan Texniki Universiteti haqqında ətraflı məlumat vermiş, Azərbaycan-Polşa əlaqələrinin inkişaf tarixinə nəzər yetirmiş və bu dostluq əlaqələrin əhəmiyyətindən danışmışdır.
Səfəri zaman M.Borçalı Varşavadakı Müsəlman qəbristanlığında uyuyan Böyük Vətən Müharibəsi Qəhrəmanı, əslən Borçalıdan olan azərbaycanlı polkovnik Vəli bəy Yadigarın məzarını da ziyarət etmişdir.

***
Qeyd edək ki, Azərbaycan-Polşa IV Beynəlxalq elmi konfransında Azərbaycan Milli Elmlər Akademiyasının Z.M.Bünyadov adına Şərqşünaslıq İnstitutunun direktoru, Milli Məclisin deputatı Gövhər xanım Baxşəliyeva Ermənistan-Azərbaycan, Dağlıq Qarabağ münaqişəsinin tari-xi, ermənilərin İrəvan xanlığına köçürülməsi, regionda aparılan demoqrafik dəyişikliklər və son günlərdə təmas xəttində baş verən hadisələr haqqında konfrans iştirakçılarına geniş məlumat verdikdən sonra “Görkəmli Azərbaycan alimi akademik Z. Bünyadovun əsərlərində Avropa mediyevistikasının nəaliyyətləri” mövzusunda məruzə etmişdir.
Həmçinin AMEA Nizami adına Ədəbiyyat İnstitutunun elmi katibi, professor Bədirxan Əhmədov “Azərbaycan ədəbi, ictimai fikrində avropalaşma”, Azərbaycan Dövlət İqtisadiyyat Universitetinin professoru Fərhad Rəhmanov “Azərbaycanda təhsil və elm”, ADPU-nun dosenti Gülşən Ağabəy “Səməd Mənsur satirasında vətəndaşlıq”, Varşava Universitetinin fəlsəfə doktorları Məleykə Hüseyn “H.Z.Tağıyevin müsəlman əsilli qızlar üçün ilk məktəbi. XIX və XX əsrlərin kəsişməsində Azərbaycanda qadınların təhsili”, Şəhla Kazımova “Füzuli poeziyasında məhəbbət mövzusu” və b. mövzularda maraqlı məruzələrlə çıxış etmişlər.