Bu gün Azərbaycan Kommunist Partiyasının (Züqanovçular) fəalları Azərbaycan Kommunist Partiyasının banisi və rəhbəri, Azərbaycan SSR-in ilk başçısı, Nəriman Kərbəlayı Nəcəf oğlu Nərimanovun (14 aprel 1870 - 19 mart 1925) doğumunun 145-ci ildönümüylə əlaqədar olaraq Bakının mərkəzində yerləşən heykəlini ziyarət ediblər.
AKP Mərkəzi Komitəsinin sədri Gülnisə Məhsimova toplaşanların qarşısında çıxış edib. O, N. Nərimanov irsi haqqında danışıb və qeyd edib ki, Nərimanov həm böyük siyasi və ictimai xadim və inqilabçı, həm də yazıçı, maarifçi, həkim və Azərbaycanda teatr incəsənətinin təşkilatçısı olmuşdur. G. Məhsimova kommunistləri N. Nərimanov irsinə sadiq olmağa və sosial ədalət uğrunda, kapitalizmin törətdiyi bərabərsizliyə qarşı çıxış etməyə çağırıb. O, həmçinin Azərbaycanın əqidəli kommunistlərini birləşməyə çağırıb və respublikada kommunist hərəkatını parçalamağa çalışanları pisləyib.
AKP-nin tədbirində həmçinin Azərbaycan Mütərəqqi Sosialist Partiyasının və Azərbaycanın Sol Sosialistləri müstəqil ekspert qrupunun liderləri - Rüstəm Şahsuvarov, Firudin Qasımov və Aleksandr Kostin iştirak ediblər.
Sonra Tədbirin gedişatında gənc kommunistlərə partiya biletləri təqdim edilib.