Dünənki mitinq bir daha Milli Şuranın və Azərbaycan Xalq Cəbhəsi Partiyasının (AXCP) Azərbaycan cəmiyyətində iflasa uğradığının göstəricisi idi. Bunu millət vəkili, Ana Vətən Partiyasının sədri Fəzail Ağamalı deyib.

O bildirib ki, bundan öncə də onlar ən müxtəlif, guya cəmiyyəti cəlb edə biləcək şüarlarla, tezislərlə mitinqlər keçirməyə çalışdılar: “Lakin onlar hər zaman xalq tərəfindən dəstəklənmədiklərinin şahidi olsalar belə bundan nəticə çıxarmaq əvəzinə martın 15-də bir daha mitinq etmək və yaranmış olan vəziyyətdə əhalinin sosial vəziyyətinin ağırlığı və bunun ağır nəticələri və s. bu kimi əsası olmayan fikirlərlə küçəyə çıxıb mitinq keçirməyə cəhdlər göstərdilər”.

Millət vəkili hesab edir ki, dünən bir daha Azərbaycan xalqı onların arxasında olmadığını ortaya qoydu: “Bir daha sübut olundu ki, həm AXCP, həm də Milli Şura Azərbaycan xalqı arasında sosial dayaqlara malik deyil. Onlar artıq fiaskoya uğrayıblar. Əslində yaxın zaman kəsiyində hər iki təşkilatın özü mahiyyət etibarilə tarixin arxivinə getməli olacaqlar. Çünki, onlar Azərbaycanda gedən proseslərə qarşı doğru məntiqə söykənən addımlar atmırlar. Onlar cəmiyyətin sosial sifarişini nəzərə almırlar. Bu gün Azərbaycan xalqının sosial sifarişi Azərbaycan dövlətinin yanında olmaq, dövlətçiliyi möhkəmləndirmək və cəmiyyətdə radikalizmə yox deyib, bütün bu və ya digər ortalığa çıxan sualların ətrafında dialoq aparmaq, qarşılıqlı söhbət etmək kimi bir düşüncənin daşıyıcılarıdırlar. Fakt bu düşüncənin daşıyıcılarından sözügedən qurumlar kənardadır. Onlar özlərini cəmiyyətdə tam mənada təbliğ etməkdədirlər”