“Vaxtilə Qarabağda yaranmış klassik Azərbaycan muğamı milli muğam operaları, simfonik muğamlar, tar ilə simfonik orkestr üçün konsertlər, etno-caz musiqisi ilə yanaşı səslənəcək... Bakı Beynəlxalq Muğam Festivalı təkcə Azərbaycan muğamı üçün yox, bütövlükdə ənənəvi milli musiqi üçün böyük bayramdır - uyğur makomundan başlamış ispan flamenkosuna qədər”.

“Baku” jurnalının mart nömrəsi nəşrin baş redaktoru Leyla Əliyevanın bu sözləri ilə başlanır.

Azerinfo.az AZƏRTAC-a istinadən bildririr ki, baş redaktorun məqaləsi Bakıda keçirilən Dördüncü Beynəlxalq Muğam Festivalına həsr edilib. Leyla Əliyeva qeyd edir ki, festival dövründə keçirilən beynəlxalq müsabiqə adətən bizi yeni parlaq istedadlarla tanış edir. Baş redaktor yazır: “Bir qayda olaraq, festival bahar bayramı – Novruz ərəfəsində başa çatır. Bunun rəmzi mənası ondan ibarətdir ki, ənənə yaşayır və yeniləşir: o, müəllimdən şagirdə keçməklə ölməzlik qazanır”.

Leyla Əliyevanın fikrincə, xanəndə Alim Qasımov hazırda dünyada ən çox rəğbət qazanmış muğam ifaçılarından biridir. Baş redaktor hesab edir ki, Alim Qasımovun populyarlığının sirri texnikanı mükəmməl mənimsəməsi və klassikanı virtuozcasına interpretasiya etməyi bacarmasındadır. Bu, əyani şəkildə sübut edir ki, novatorluq ənənəni inkar etmir, onu yalnız gücləndirir. Lakin bu, yalnız böyük istedad sahiblərinə müyəssər olur.

“Baku” jurnalının yeni nömrəsinin səhifələrində ən müxtəlif mövzularda olduqca maraqlı məqalələr tapmaq olar.

Xüsusi layihə. Jurnalın bu bölməsində Azərbaycanın ənənəvi musiqi alətləri, “Bizimkilər” televiziya layihəsi haqqında məqalələr, Alim Qasımovla müsahibə, Azərbaycanın qədim musiqi alətləri ansamblı barədə material təqdim edilir.

İşlər və hisslər. “Polad Bülbüloğlu öz ad gününü yalnız doğma Bakıda qeyd etməyə hazırlaşırdı, lakin Prezident İlham Əliyev ona Moskvada da bir konsert verməyi məsləhət gördü və bununla musiqiçinin istedadının Rusiyadakı bütün pərəstişkarlarına hədiyyə etmiş oldu”, - bu sözlər Azərbaycanın Rusiyadakı səfiri Polad Bülbüloğlunun bu günlərdə qeyd olunmuş 70 illik yubileyi haqqında Anna Qordeyevanın məqaləsindən götürülüb.

“Xalq artisti”. “Həqiqətin və məhəbbətin gücü” məqaləsi Azərbaycanın və Rusiyanın digər tanınmış baritonu, Böyük Teatrın solisti Elçin Əzizova həsr edilib. Məşhur həmvətənimiz bu yaxınlarda Nyu-York Metropoliten-Operanın səhnəsində P.Çaykovskinin “İolanta” operasında mavritaniyalı təbib İbn Hakianın rolunu böyük müvəffəqiyyətlə ifa edib.

Bakı mühiti. “Bakılılar arasında müxtəlif təbəqələr olub: bomond, modabazlar, alimlər, lotular... Lakin bu insanların hamısını birləşdirən ümumi anlayışlar var: əgər kişi qadınla gedirsə, həmin qadına baxmaq olmaz. Vəssalam”, - məşhur fotorəssam Sənan Ələsgərov “Müqəddəs diyar” adlı məqaləsində öz xatirələrini bölüşür.

Qovuşuq. Heydər Əliyev Fondunun vitse-prezidentinin təşəbbüsü ilə Bakıda Mixail Yuryeviç Lermontovun 200 illik yubileyinə həsr edilmiş təntənəli tədbirlər keçirilib. “M.Y.Lermontovun yaradıcı irsi dünya mədəniyyətinin bir hissəsi kimi” mövzusunda "dəyirmi masa" Lermontov günlərinin proqramının mühüm tərkib hissəsi olub. Bu görüşdə rusiyalı və azərbaycanlı alimlər, mədəniyyət xadimləri, ədəbiyyatçılar, jurnalistlər arasında fikir mübadiləsi aparılıb. “Baku” jurnalı bu tədbir haqqında çox maraqlı məlumatlar təqdim edir.

Moda marşrutu. “Bakıda gördüklərim, əlbəttə, yalnız tərifə layiqdir” – “ZİLLİ” markasının banisi Alen Şimel bu sözləri “Baku” jurnalına müsahibəsində söyləyib. Bu rubrikanın qonağı, “Buşeron” zərgərlik evinin rəhbəri Pyer Buissu isə hesab edir ki, “Bakı hamının can atdığı məkana çevrilir”.

Möcüzəli yemək. “Baku” jurnalının qonağı, Abşerondakı bağ evlərindən birinin sahibi Sinavər Maniyeva bu rubrikada səməni halvası hazırlamağın sirlərini oxucularla bölüşür.