Keçirilən əməliyyatla həmin şəxslər elə iş başında yaxalanıb. Baş Mütəşəkkil Cinayətkarlıqla Mübarizə İdarəsinə Abşeron rayonu ərazisində keyfiyyətsiz, saxta spirtli içkilərin istehsal edilməsi barədə məlumat daxil olub. Keçirilən əməliyyat nəticəsində məlum olub ki, Gürcüstan Respublikasında anadan olan Bərxudar Həsənov Abşeron rayonu, Saray qəsəbəsində kirayədə yaşadığı ünvanda kustar üsulla saxta spirtli içkilər istehsal edir. O, bu içkiləri gizli qurduğu sexdə həmyerlisi Şakir Muradov və Şabran rayon sakini Bəhruz Ömərovla birlikdə hazırlayırmış. Sexə baxış zamanı külli miqdarda saxta, keyfiyyətsiz spirt, Azərbaycan və Rusiya Federasiyasının saxtalaşdırılmış aksiz markaları, eləcə də spirtli içkilərin hazırlanması üçün istifadə olunan xüsusi avadanlıqlar götürülüb.
Aşkar edilən spirtli içkilər Ədliyyə Nazirliyinin Məhkəmə Ekspertizası Mərkəzinə göndərilib. Ekspertizanın rəyinə əsasən həmin spirtli içkilərin keyfiyyətsiz, insan orqanizminə ciddi təhlükə yaradan və istifadəyə tamamilə yararsız olması müəyyən edilib. Hazırda faktla bağlı araşdırmalar davam etdirilir.

http://kepeztv.az