Həkimlər uşağın həyatının təhlükədə olması barədə qadının həyat yoldaşına xəbərdarlıq edibmiş

Gəncədə 9 aylıq oğlunu su hovuzuna atan ana haqda bəzi təfərrüatlar məlum olub.
Cinayəti törədən 43 yaşlı Mətanət Hüseynovanın həyat yoldaşı Telman Hüseynovun APA TV-yə verdiyi məlumata görə, təxminən bir il əvvəl həyat yoldaşı hamilə olanda onun psixi durumunda dəyişiklik olub. Övladı dünyaya gəldikdən sonra isə bu dəyişiklik daha da artıb. Hətta körpə uşağa zor tətbiqetmə kimi hallara da rast gəlinib.
Dörd ay ev şəraitində müalicə alan Mətanət Hüseynovanın səhhətində heç bir irəliləyiş olmadığından, ailə üzvləri onu fevralın 18-də Gəncə Rayonlararası Ruhi Əsəb Dispanserinə aparıblar. Oradakı həkimlər qadının ruhi əsəb xəstəsi olduğunu, qucağındakı 9 aylıq Elmir Hüseynova zor tətbiq etdiyini, uşağı sevmədiyini və digər yersiz fikirlər səsləndirdiyini görərək, ona Qazax Rayonlararası Ruhi Əsəb Xəstəxanasına göndəriş yazıblar. Hətta həkimlər uşağın həyatının təhlükədə olması barədə qadının həyat yoldaşı Telman Hüseynova xəbərdarlıq da ediblər. Bir gün sonra - fevralın 19-da isə Mətanət Hüseynova 9 aylıq övladını evin həyətində olan su hovuzuna atıb. Evdə olanlar özlərini çatdırsalar da, uşağın həyatını xilas etmək mümkün olmayıb.
Faktla bağlı Gəncə şəhər Prokurorluğunda cinayət işi açılıb. Hadisəni törədən 1973-cü il təvəllüdlü Mətanət Məmməd qızı Hüseynova barəsində məhkəmənin qərarı ilə həbs-qətimkan tədbiri seçilib. Onun Elmirdən başqa hərbi xidmətdə olan oğlu və ali məktəb tələbəsi olan qızı da var.

***

11:57

Gəncədə dəhşətli qətl törədilib.
Gəncə Şəhər Prokurorluğundan APA-ya verilən məlumata görə, hadisə fevralın 19-da şəhərin Kəpəz rayonunda qeydə alınıb. Rayon sakini, 1973-cü il təvəllüdlü Mətanət Məmməd qızı Hüseynova 9 aylıq oğlu Elmir Telman oğlu Hüseynovu həyətdəki su quyusuna atıb. Nəticədə uşaq boğularaq ölüb.
Faktla bağlı Gəncə Şəhər Prokurorluğunda Cinayət Məcəlləsinin 120.1-ci maddəsi ilə cinayət işi başlanıb.
Hadisəni törədən M. Hüseynova həmin iş üzrə təqsirləndirilən şəxs qismində cəlb edilməklə barəsində məhkəmənin qərarı ilə həbs qətimkan tədbiri seçilib.
APA-nın əldə etdiyi məlumata görə, M. Hüseynova psixi xəstə olub.