Bakıda qayın yeznənin evindən külli miqdarda pul oğurlayıb. Masallıda bağçadan 3600 manat dəyərində oğurluq edən rayon sakini yaxalanıb. Şəki şəhərində isə mağaza yaran cinayətkar dəstə yaxalanıb.

Paytaxtın Bakuvi küçəsi, ev 12 ünvanında oğurluq faktı baş verib. Həmin ünvanda yaşayan Turan Seyidov hüquq-mühafizə orqanlarına müraciət edərək bildirib ki, onun evindən 45 min ABŞ dolları oğurlanıb. O, polisə müraciətində bildirib ki, pullar mənzilində saxladığı seyfdən aparılıb. Həyata keçirilin əməliyyat-axtarış tədbirləri nəticəsində müəyyən olunub ki, oğurluğu zərərçəkənin qaynı - 45 yaşlı Yaşar Məmmədov törədib. Həmin şəxs həbs olunaraq istintaqa cəlb edilib və ilkin ifadəsində ona qarşı irəli sürülən ittihamları etiraf edib.

Bakıda aparılan növbəti bir əməliyyatla isə tək yaşayan qadının mənzilindən oğurluq edən şəxs tutulub. İstintaq tədbirləri ilə sübuta yetirilib ki, fevralın 17-də Humay Yusifovaya məxsus evdən 2770 ABŞ dollarını və qızıl əşyaları Bakı şəhər sakini Ağalar Quliyev oğurlayıb.
Masallı Rayon Polis Şöbəsinin əməkdaşlarının həyata keçirdikləri tədbirlər nəticəsində isə rayon sakini 41 yaşlı Tofiq Ağayev şübhəli şəxs qismində saxlanılıb. İlkin araşdırmalardan sonra müəyyənləşdirilib ki, Tofiq Ağayev müxtəlif vaxtlarda gecə saatlarında rayonun Həzi Aslanov küçəsində yeni inşa olunan uşaq bağçasının pəncərəsindən qanunsuz daxil olub. O, bağçadan müxtəlif adda tikinti və məişət avadanlıqları oğurlayaraq 3600 manat dəyərində maddi ziyan vurub. Polis şöbəsində saxlanılan şəxsin üzərinə baxış keçirilərkən onun cibindən şəxsi istehlak miqdarından artıq çəkidə - 9, 741 qram narkotik vasitə olan tiryək aşkarlanaraq götürülüb.
Fevralın 18-də Şəki şəhərində yaşayan Elşən Əsədliyə məxsus mağazadan pul və tütün məmulatı oğurlayan şəxslərin kimliyi də müəyyən olunub. Hadisəni törədən Zaqatala rayon sakinləri Yaşar Səlimov, Namiq Mirzəyev və Salyan rayon sakini Xəyal İsmayılov tutulub. İsitntaqla sübuta yetirilib ki, bu şəxslər dəstə şəklində ətraf rayon və kəndlərdə oxşar cinayətlər törədiblər.

Artıq bütün faktlarla bağlı Cinayət Məcəlləsinin müvafiq maddələri ilə cinayət işi açılıb, araşdırmalar davam etdirilir.

http://kepeztv.az