Hüquq mühafizə orqanı əməkdaşları “Çay evi” adı altında qumarxana işlədənlərin işinə sözün əsl mənasında mane olublar. Gözdən pərdə asaraq qanunu pozanlar cinayətkar əməllərinə görə cavab verməli olacaqlar.

Paytaxt ərazisində fəaliyyət göstərən çay evlərindən birinin qumarxana kimi işlədilməsi faktını Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsi əməkdaşları aşkar ediblər. Binəqədi rayonunda yerləşən obyektdə qumar oyunları keçirildiyi müəyyən edilib. Oyunları təşkil edən və iştirakçısı olan 5 nəfər saxlanılıb. Ağcabədi rayon sakini Alxas Abbasovun Yevlax rayon sakini Fazil Səfərəliyevlə əlbir olaraq bir neçə aydır ki, obyekti gündüzlər çay evi, axşam saatlarında isə qumarxana kimi istifadə etdikləri məlum olub. Məkandan oyun kartları və qumarda oynanılan pul maddi sübut kimi aşkar olunaraq götürülüb. Faktla bağlı cinayət işi açılıb, araşdırmalar davam etdirilir.

kepeztv.az