Ağcəbədidə mağaza oğruları tutulub. Saxlanılan şəxslərdən birinin 17, digərinin isə 18 yaşı var. Gəncədə də oğurluq faktının üstü açılıb.

Ağcabədi rayonunda oğurluq hadisəsi baş verib. Naməlum şəxslər rayonun Xəlfələddin kücəsində yerləşən Elvin Hüseynzadəyə məxsus ərzaq mağazasından pul, siqaret, ərzaq məhsulları və digər əşyaları oğurlayıblar. Həyata keçirilən əməliyyat-axtarış tədbirləri nəticəsində mağaza oğruları olan iki yeniyetmə rayon sakinləri - 18 yaşlı Nicat Mehtiyev və 17 yaşlı yeniyetmə yaxalanıblar. İlkin araşdırmalardan məlum olub ki, saxlanılan şəxslər qabaqcadan əlbir olaraq gecə saatlarında sözügedən ticarət obyektinin qapısının pəncərəsini dəmir parçası ilə sındırmaqla içəri daxil olublar. Onlar qarət etdikləri malları yarı bölərək yaşadıqları evdə gizlədiblər. Oğurlanmış əşyaların müəyyən qismi polis tərəfindən aşkar edilərək maddi sübut kimi götürülüb.

Gəncədə də oğurluq faktının üstü açılıb. Kəpəz rayon Polis İdarəsi əməkdaşlarının apardıqları əməliyyat tədbirləri nəticəsində Kamil Məmmədov adlı şəxsin evindən oğurluq edən şəhər sakini Bahadur Məmmədov tutulub. İlkin istintaq zamanı məlum olub ki, adıçəkilən şəxs Kamil Məmmədovun evindən 200 manat və 100 ABŞ dolları, habelə 13000 ABŞ dolları və 6650 manat dəyərində qızıl-zinət əşyaları oğurlayıb.

Artıq hər iki faktla bağlı cinayət məcəlləsinin müvafiq maddəsi ilə cinayət işi açılıb.

kepeztv.az