Məryəm Nemətzadənin qızına onun bacısı, oğlu və əri də kömək edib.

Bakıda 43 bıçaq zərbəsi vurularaq qətlə yetirilən “Jewellery” zinət əşyaları mağazasının sahibi Məryəm Nemətzadənin qətlinin bəzi təfərrüatları məlum olub. ANS PRESS-in hadisə yerində olan müxbirinin verdiyi məlumata görə, istintaq hazırda bir versiya üzərində çalışır.

Qətldə onun qızı Günel Hüseynovaya Məryəmin bacısı Fəxriyyə, bacısının həyat yoldaşı Sənan və onların övladı, 17 yaşlı Nicat köməklik göstərib.

Hazırda həmin şəxslər tutularaq istintaqa cəlb ediliblər.
Məsələ ilə bağlı Nəsimi Rayon Polis İdarəsi və Prokurorluğundan isə istintaq sirri olduğu üçün hələlik heç bir açıqlama verilmir.

Fotonu "Qafqazinfo" təqdim edib.

Saat 10:50

Dekabrın 5-i günorta saatlarında paytaxt ərazisində 43 bıçaq zərbəsi vurularaq qətlə yetirilən “Jewellery” zinət əşyaları mağazasının sahibi Məryəm Nemətzadənin qatilləri məlum olub.
Hüquq-mühafizə orqanlarından ANS PRESS-ə verilən məlumata görə, aparılan istintaq-əməliyyat tədbirləri nəticəsində qətli törədən şəxsin öldürülən qadının qızı Günel Hüseynova və onun bir neçə qohumu olduğu müəyyən edilib. Artıq Günel Hüseynova və onun qətlində iştirak edən qohumları saxlanılıb. Hələlik qətlin hansı məqsədlə törədildiyi araşdırılır.

İlkin ehtimala görə, ailə daxilində tez-tez pul üstündə mübahisə olub.
Qətl hadisəsi iki gün əvvəl Nəsimi rayonu, Feyzulla Qasımzadə küçəsi, 17 ünvanında baş verib.
Həmin mənzildə yaşayan 55 yaşlı Məryəm Nemətzadə bıçaqla qətlə yetirilib. Qadının meyiti başı kəsilmiş vəziyyətdə aşkarlanıb.

Məlumata görə, qətlə yetirilən qadın uzun müddət bahalı qızıl və zinət əşyalarının satışı və kirayəsi ilə məşğul olub. Onun müştəriləri arasında hətta tanınmış şou-biznes nümayəndələrinin də olduğu bildirilir.

M.Nemətzadə Bakıdakı məşhur “Jewellery” zinət əşyaları mağazasının sahibi olub.

Faktla bağlı Nəsimi rayon Prokurorluğunda 120.2.11-ci (quldurluq, hədə-qorxu yolu ilə tələb etməklə qəsdən adamöldürmə), 181.3.3 (quldurluq, zərərçəkmiş şəxsin sağlamlığına ağır zərər vurma) maddələri ilə cinayət işi açılıb.

Hadisədən sonra M.Nemətzadənin qızı Günel Hüseynova izahatında evdən ona məxsus 30000 ABŞ dolları dəyərində qızıl əşyaların oğurlandığını bildirmişdi.