Bərdə rayonun Ləmbəran kənd sakini Mütalib Quliyevə məxsus avtomobil oğurlanıb.

Azerinfo.az El TV-yə (Region TV) istinadən xəbər verir ki, hadisə Mütalib Quliyev rayonun Alpoud kəndi ərazisində fəaliyyət göstərən heyvan bazarında heyvanlarını satarkən baş verib. Onun sözlərinə görə, 66-BH-297 dövlət nömrə nişanlı "VAZ-2107" markalı minik maşınını Yevlax-Ağcabədi yolunun üzərində, Yuxarı Qarabağ kanalının yaxınlığında saxlayraq bazara daxil olub. Lakin bazardan çıxarkən şəxsi avtomobilini saxladığı yerdə görməyib.

Mütalib Quliyev bildirir ki, sonra hadisə ilə əlaqədar polisə müraciət edib. "Səhər-səhər 6 radələrində gəldim mal bazarına. Bir danam var idi. Gətirdim onu satmağa. Maşının qapısını kilitlədim, qoydum bazar ərazisinə, getdim bazara. 12 radələrində qayıtdım ki, maşın yoxdur. Zəng vurdum qaynar xəttə. Bütün sənədlərim də içindədir", - deyə Mütalib Quliyev bildirib.

Avtomobilin sahibi deyir ki, həmin vaxt ərazidə sıxlıq olsa da, ona məxsus əmlakın hansı şəraitdə aparıldığını kimsə görməyib. Bərdə rayon Polis Şöbəsindən isə bildirilir ki, hazırda həmin faktla bağlı araşdırma aparılır. Məlumata görə, bu son 3 ildə Bərdə mal bazarında baş verən ikinci avtomobil oğurluğu faktıdır.