Bakının Binəqədi rayonunda Niyaz Fərəməzov dostları ilə birlikdə əlbir olaraq oğurluğa əl atıb. Qubada isə qeyri-adi oğurluq hadisəsi baş verib.

Bakı sakini 24 yaşlı Niyaz Murad oğlu Fərəməzov toydan sonra borclarını qaytarmaq üçün pul tapa bilmədikdə oğurluq etmək qərarına gəlib. O, tanışları - şəhər sakinləri Namiq Pirverdiyev və Simran İlyasovla görüşərək oğurluq etmək fikrində olduğunu bildirib və bu işdə onlardan kömək istəyib. Beləliklə oktyabrın 5-də Niyaz Fərəməzov adıçəkilən şəxslərlə əlbir olaraq yaxın qohumu Fərqanə İbrahimovanın evindən qızıl əşyaları oğurlayıb. Qız qaçırdıb özünə toy edən Niyaz Fərəməzov toy borclarını da ödəyə bilməyib. Binəqədi polisi onu və cinayət yoldaşlarını saxlayaraq istintaqa təhvil verib.

Quba rayonunda isə naməlum şəxslər Elvir Bayramova məxsus alma bağına girərək yığılıb satış üçün hazırlanan 200 yeşik almanı oğurlayıblar. Hadisə gecə saatlarında baş verib. Səhər bağa gələn Elvir Bayramov almaların oğurlandığını görüb və bununla bağlı Quba rayon Polis Şöbəsinə müraciət edib. Hadisəni törədən şəxslərin müəyyənləşdirilib saxlanılması istiqamətində əməliyyat-axtarış tədbirləri həyata keçirilir.

Hər iki faktla bağlı araşdırma aparılır.

http://kepeztv.az/