Goranboyda bir ailənin 7 üzvünü qətlə yetirən şəxsin cinayət işi üzrə məhkəmə prosesi başlayıb

Gəncə Ağır Cinayətlər Məhkəməsində bir ailənin 7 üzvünü qətlə yetirməkdə təqsirləndirilən Rafiq Hüseynovun cinayət işi üzrə məhkəmə prosesi başlayıb. Xatırladaq ki, qanlı hadisə ötən il oktyabrın 1-də Goranboy rayonunun Səfikürd kəndində qeydə alınıb.

Hakim Zabil Qasımovun sədrliyi ilə keçirilən hazırlıq iclasında təqsirləndirilən şəxsin anket məlumatı dəqiqləşdirilib. Prosesin baxış iclası aprelin 17-nə təyin edilib. Qeyd edək ki, ötən il oktyabrın 1-də Goranboy rayonunun Səfikürd kəndində Diləzbər Məmmədovanın yaşadığı evə gələn kürəkəni Rafiq Hüseynov ailə-məişət münaqişəsi zəminində ov tüfəngindən və əl qumbarasından istifadə edərək arvadı Südabəni, qaynı Namiqi, qohumları Ofelya Məmmədovanı, Həvayət Məmmədovanı, Fərqanə Məmmədovanı və azyaşlı İsa Məmmədovu, habelə Diləzbəri qətlə yetirib.
R. Hüseynov könüllü olaraq Goranboy Rayon Polis Şöbəsinə gəlib və hadisəni törədərkən istifadə etdiyi ov tüfəngini təhvil verib.
O, Azərbaycan Cinayət Məcəlləsinin qəsdən adam öldürmə - xüsusi amansızlıqla və ümumi təhlükəli üsulla törədildikdə və xuliqanlıq niyyəti ilə adam öldürmə maddələri ilə ittiham olunur. Onu da qeyd edək ki, hadisədən bir müddət sonra Rafiq Hüseynovun qardaşı, Afiq Hüseynov özünü asaraq intihar edib. Bu mənzərəni görən mərhumun atası Müzəffər Hüseynov isə infarkt keçirərək dünyasını dəyişib.

kepeztv.az