Keçmiş polis işçisini öldürüb, cəsədini parçalayıb, yeməkdə şübhəli bilinən ata-oğul saxlanılıb.

Milli.Az Dailymail-ə istinadla xəbər verir ki, Ukraynanın Xarkov vilayətinin Saltivka şəhərində başsız cəsəd tapılıb.

Hissələrə parçalanmış cəsədin 45 yaşlı keçmiş polis işçisinə aid olduğu aşkarlanıb. O, oktyabr ayının 4-dən axtarışda imiş. Sabiq polis axırıncı dəfə iki nəfərlə içki içərkən görüntülənib.

“Cansız bədəni görəndə özümü itirdim. Onun başsız olub-olmadığına əmin olmaq üçün diqqətlə baxdım. Sonra hadisə yerinə gələn polislər cəsədin hissələrə ayrıldığını təsdiqlədi. Onun bədənindən ət parçası qoparılmışdı”, – cəsədi tapan hadisə şahidi söyləyib.

Şübhəli şəxs kimi nəzərdə tutulan ata və oğulun evində aparılan axtarışlar zamanı eyvandan həmin kişinin başı tapılıb.

Nə qurbanın, nə də qatillərin adı açıqlanır.

Qatillər çılpaq halda, evlərində polis tərəfindən tutulub, qolları qandallanaraq yerə yatırılıb.Saxlanılan 20 yaşlı oğlan ifadəsində atasının kişinin ayağından qopardığı ət tikələrini qaynatdığını söyləyib. O bildirib ki, kişinin cəsədini yeyiblər.

Cinayət ölkədə rezonans doğurub. Hazırda araşdırmalar davam etdirilir.