Aprelin 27-də Suraxanı rayonu Bülbülə qəsəbəsində törədilmiş qətl hadisəsi ilə bağlı maraqlı məqamlar üzə çıxıb. Lent.az-ın hadisə yerində olmuş əməkdaşı xəbər verir ki, 64 yaşlı Yuri Rojkov gəlini, 34 yaşlı Berezuyeva İnna Eduardovnanı qətlə yetirərkən evdə onlardan başqa kimsə olmayıb. Belə ki, dünən evdə yemək bişirən İnna ondan 9 yaş kiçik olan həyat yoldaşı Valerini ərzaq almaq üçün mağazaya göndərib. Bu zaman gəlinlə qayınatası arasında bəlli olmayan səbəblərdən münaqişə yaranıb və Y.Rojkov oğlu ilə qeyri-rəsmi nikahda olan qadını 18 bıçaq zərbəsi ilə qətlə yetirib.
Bildirilir ki, hadisəni törədən Y.Rojkovun həyat yoldaşı 1 ilə yaxındır vəfat edib. Onun böyük oğlu isə 15 yaşından ruhi əsəb xəstəxanasındadır. Özünün də ruhi-əsəb problemləri olan 64 yaşlı kişi bir müddət əvvəl dispanserdə müalicə olunurmuş. Onun kiçik oğlu Valeri isə anasının vəfatından sonra sevgi münasibətində olduğu İnnanı evə gətirib. Avtomobil və motosiklet təmiri ilə məşğul olan 25 yaşlı Valeri 1 ay əvvəl dispanserdə müalicə olunan atasını evə gətirərək normal həyata qayıtmasına kömək etmək istəyib. Maddi imkanı o qədər də yaxşı olmayan gənc oğlan imkan tapıb evi də təmir etdirib.
Qonşularının bildirdiyinə görə, Rojkov ailəsində irsi ruhi xəstəlik olub. Bununla belə, qonşular evin kiçik oğlu olan Valerini zəhmətkeş, sakit təbiətli şəxs kimi xarakterizə ediblər.
Hadisədən sonra polis tərəfindən saxlanılan Y.Rojkov ilkin ifadəsində qətli hansı səbəbdən törətdiyini izah edə bilməyib və olayı tam xatırlamayıb. O, həmçinin qorxduğu üçün qadına 18 bıçaq zərbəsi endirdiyini deyib.
Faktla bağlı başlanmış cinayət işinin istintaqı davam etdirilir.

***

Bu gün Bakının Suraxanı rayonunda baş vermiş qətlin təfərrüatı məlum olub.
Lent.az-ın hadisə yerində müxbirinin verdiyi məlumata görə, qətli törədən 1952-ci ilə təvəllüdlü Yuri Rojkov ruhi xəstə imiş. O, uzun müddət ruhi-əsəb xəstəlikləri dispanserində qalıb. Bir müddət əvvəl isə oğlu onu oradan çıxarıb evə gətirib ki, normal həyata qayıtsın.

Əməkdaşımızın əldə etdiyi məlumata görə, Y.Rojovun oğlu 1982-ci il təvəllüdlü İnna Berezuyeva ilə ailə həyat qurubmuş və onlar birlikdə yaşayırmışlar. Lakin aralarında rəsmi nikah yox imiş. Hadisə isə belə baş verib: Evdə gəlini ilə tək qalan ruhi xəstə Yuri Rojkov hələlik müəyyən edilməyən səbəblərə görə onunla mübahisə edib... və düz 18 bıçaq zərbəsi ilə gənc qadını qətlə yetirib.

***

Bakıda qətl törədilib.
Suraxanı rayon Prokurorluğundan APA-ya verilən məlumata görə, hadisə rayonun Bülbülə qəsəbəsində qeydə alınıb. Qəsəbə sakini Yuri Rojkov oğlu ilə qeyri-rəsmi nikahda olan 1982-ci il təvəllüdlü İnna Berezuyevanı çoxsaylı bıçaq zərbəsi ilə qətlə yetirib.
Hadisəni törədən Y. Rojkov saxlanılıb.

Faktla bağlı Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb, istintaq gedir.