Gəncə və ətraf rayonlarda oğurluq etməkdə şübhəli bilinən 2 nəfər saxlanılıb. Həmin şəxslər avtomobillərin ehtiyat hissəsinin və akkumulyatorlarını oğurlmaqda şübhəli bilinirlər.
Gəncə şəhər sakinləri - Səbuhi Xudiyev və Elmir Şirinov gecə saatlarında şəhərin müxtəlif ərazilərində dayanmış vəziyyətdə olan avtomobillərin akkumulyatorlarını sökərək oğurlayıblar. Saxlanılan şəxslər əldə etdikləri qəniməti metal qəbulu məntəqələrinə sataraq, pulu aralarında bölüblər. Gəncə şəhəri ilə kifayətlənməyən dostlar bu kimi əməllərini Daşkəsən, Şəmkir, Goranboy, Göygöl rayonlarında da reallaşdırıblar. Ümumilikdə 40-a yaxın vətəndaşa ziyan vuran şəxslər Gəncə polisi tərəfindən ələ keçirilib.

Fərid Məmmədov- müstəntiq: "Adları qeyd olunan şəxslər, oğurluq cinayətini törətməzdən öncə şəhər ərazisində ətraf rayonlarından aldıqları balıqların alveri ilə məşğul olublar. Həmin şəxslər alver etməklə bərabər, eyni zamanda Gəncədən və ətraf rayonlardan akkumulyator oğurlayaraq satıblar".

Saxlanılan şəxslər əməllərini səmimi etiraf edərək, peşman olduqlarını bildiriblər.

Səbuhi Xudiyev- saxlanılan şəxs: "Oğurluq etməkdə məqsədim, alimentin pulunu ödəyə bilməməyim olub. Boşandığım ailəm məni çox sıxırdı, həm də uşağın biri mənim himayəmdə olub".
Faktla bağlı cinayət işi başlanılıb, istintaq aparılır. Səbuhi Xudiyevin və Elmir Şirinovun başqa cinayətlərdə iştirakı araşdırılır.

kepeztv/az