Vəkil Adəm Məmmədov bu gün mətbuat konfransı keçirib. O, hüquqlarını müdafiə etdiyi İsmayıl Əliyevin 2005-ci ildə itkin düşmüş oğlu Elsevər Əliyevin barəsindəki cinayət işinin təzələndiyini bildirib.

Virtualaz.org saytının xəbərinə görə, vəkil on il əvvəl Bərdə rayonundan tapılan naməlum kişi meyitinin Elsevər Əliyevə məxsus olduğunu deyib.

Vəkilin sözlərinə görə, sözügedən cinayət işi obyektiv araşdırılmayıb. Ölən şəxsin kimliyini müəyyən etmək üçün genetik ekspertiza təyin olunub: “Bərdə rayonundan tapılan meyit Əliyevlər ailəsinə göstərilməyib. Binəqədi Rayon Prokurorluğunda adam oğurluğu ilə bağlı cinayət işi başlanıb. Həmin dövrdə bu məsələ Binəqədi Rayon Prokurorluğu tərəfindən ciddi araşdırılmayıb. İş üzrə Sahibə Həsənova adlı qadın dindirilib və Elsevərin itkin düşməsi ilə bağlı xəbərsiz olduğunu deyib. Sahibə Həsənova ilə Elsevərin iş birliyi olub.

S.Həsənovanın dogma qızı Gülxar Sadıqova isə qətldə anasını günahlandırıb. Bununla bağlı mətbuat konfransı da keçirilib. Bir çox şəxslər Sahibə Həsənovanın əməllərindən rəsmi orqanlara müraciət edib. Sonradan mənə məlum olub ki, bu qadın həmkarım Elçin Sadıqovun anasıdır. O, bu işi məxfi saxlamağa çalışırdı və bu məsələdə məni kəskin şəkildə qınayırdı.

Göründüyü kimi, on il əvvəl açılmayan bir cinayət işi açıldı. Hazırda təqsirləndirilən şəxslər müəyyən edilməsə də istintaq hərəkətlərinin sonunda həqiqətlər üzə çıxacaq”.

Vəkil bildirib ki, bu işdə olan əməliyyat tapşırıqlarının Dövlət Təhlükəsizlik Xidmətinə həvalə olunmasını istəyir: “Bu işin açılmasında Sahibə Həsənovanın qızı Gülxar Sadıqovanın böyük rolu olub. Onun ifadəsi nəticəsində istintaq təzələnib. Elsevər xüsusi amansızlıqla qətlə yetirilib, meyit doğranılıb, sonra yandırılıb.

Hüquq-mühafizə orqanlarından xahişim budur ki, bu iş obyektiv aparılsın, əməliyyat tapşırıqları Dövlət Təhlükəsizlik Xidmətinə həvalə edilsin. Bundan sonra cinayət işinin tam, hərtərəfli araşdırılacağına, təqsiri olanların cəzalandırılacağına əminəm”.

Mərhumun atası İsmayıl Əliyev də oğlunun ölümündən iki il öncə Sahibə Həsənova ilə işbirliyinə başladığını bildirib: “Sonradan onların qeyri-rəsmi münasibəti də olub. Elsevəri, Sahibənin bir neçə cinayətindən xəbəri olduğu üçün öldürüblər. 6 iyul 2015-ci ildə oğlum zəng vurdu ki, ata, kəndə gəlirəm. Ondan sonra Elsevərdən xəbərimiz olmadı. Sahibəgil oğlumu planlı şəkildə öldürüblər. Bizimlə bağlı veriliş efirə gedəndən sonra isə Xoşqdəm xanıma (telejurnalist Xoşqədəm Hidayətqızı-red.) zəng edilib, təzyiqlər olunub. Elsevər yoxa çıxandan sonra İrana getdiyini bildirdilər”.

Vəkil Elçin Sadıqov isə açıqlamasında bildirib ki, bütün deyilənlər yalan, şər və iftiradır.