Əməliyyat Sumqayıt şəhəri, BTZ bağları adlanan ərazidə yaşayan bir qrup sakinin şikayət ərizəsi əsasında keçirilib. Onlar evlərindən oğurluq edildiyini bildiriblər. Araşdırmalara başlayan polis hadisələri törətməkdə şübhəli bilinən Füzuli rayon sakini 45 yaşlı Şükür Quliyevi saxlayıb. İstintaqa təhvil verilən şəxs evlərə pəncərədən daxil olduğunu deyib.
Şükür Quliyev özünə haqq qazandırmağa çalışaraq oğurluğu pula ehtiyacı olduğu üçün etdiyini bildirib. O, evlərdən götürdüyü qızılların və pulun bir hissəsini qaytarsa da, qalan hissəsini satdığını deyib.
Sumqayıt Şəhər Polis İdarəsindən bildirilib ki, Şükür Quliyevin digər oğurluq hadisələrində də əlinin olması istisna edilmir.
Qeyd edək ki, saxlanılan şəxs əvvəllər də eyni əmələ görə bir neçə dəfə məhkumluq həyatı yaşayıb. Faktla bağlı Sumqayıt Şəhər Polis İdarəsində başlanan cinayət işi üzrə araşdırmalar davam edir.

kepeztv.az