Bank məlumat yaydı

Azərbaycan kredit təşkilatlarının sənaye sektoruna verdiyi kreditlərin məbləği 2 milyardı ötüb.

Azerinfo.az-a Mərkəzi Bankdan verilən məlumata görə, 2015-ci ilin iyunun 1-nə sənaye və istehsal sektoruna verilən kreditlər 2 milyard 182,8 milyon manata çatıb.

Bu da ötən ilin əvvəli ilə müqayisədə 175,7 milyon manat və ya 8,75% çoxdur.

Qeyd edək ki, sənaye sektoruna verilən kreditlərin cəmi kreditlərdə (20 milyard 468,1 milyon manat) xüsusi çəkisi 10,7 % təşkil edib.

Məlumat üçün bildirək ki, kredit təşkilatları tərəfindən 20 milyard 468,1 milyon manat kredit qoyuluşunun 2 milyard 912,2 milyon manatı “Ticarət və xidmət”ə (xüsusi çəkisi 14,2%), 935,1 milyon manatı kənd təsərrüfatı və emala (xüsusi çəkisi 4,6%), 2 milyard 814,8 milyon manatı inşaat və əmlaka (xüsusi çəkisi 13,8 %), 890,9 milyon manatı nəqliyyat və rabitəyə (xüsusi çəkisi 4,4%), 276,2 milyon manatı energetika, kimya və təbii ehtiyatlara (xüsusi çəkisi 1,3%), 8 milyard 043,4 milyon manatı isə (xüsusi çəkisi 39,3%) ev təsərrüfatlarına aid olub.

Xatırladaq ki, vaxtı keçmiş kreditlərin ümumi həcmi isə bir ayda 1 milyard 256,6 milyon manatdan 1 milyard 313,2 manata qalxıb. Ümumi kredit qoyuluşunda pay isə 6,1%-dən 6,4%-ə qədər artıb.

Qeyd edək ki, istehlak kreditlərinin həcmi azalmaqda davam edir. Belə ki, bir ayda istehlak kreditlərinin həcmi 8 milyard 197,7 milyon manatdan 8 milyard 043,4 milyon manata düşüb.

Onu da əlavə edək ki, istehlak kreditlərinin azalmasına səbəb manatın devalvasiyasından sonra bankların istehlak kreditləşməsini qismən məhdudlaşdırması ilə bağlıdır.