“Azərsun Holdinq” endirimli market (discount market) seqmentinə daxil olub. Şirkət "Sərfəli” adlı ilk marketini istifadəyə verib

Ulus.Az marja-ya istinadən xəbər verir ki, holdinqin direktoru Savaş Uzan bildirir ki, keyfiyyətli məhsulları daha ucuz təklif etmək üçün yeni konseptdə marketlər şəbəkəsi yaradılır:

“Sərfəli” marketlərdə satılan məhsulların “Bazarstore”larda satılan məhsulların keyfiyyətindən fərqli olmayacaq. Belə konsept marketlər üçün marketinq və reklam xərcləri nəzərdə tutulmur, həmçinin iri marketlər ilə müqayisədə digər xərclər də aşağı olur. Xərclər az olduğundan məhsular da iri supermarketlər ilə müqayisədə ucuz satılır.

Savaş Uzan qeyd edib ki, bu ilin sonunadək “Sərfəli” adında 50 marketin açılması planlaşdırılır:

“Biz küçədəki marketi alıb, üzərinə “Sərfəli” adını vurmayacağıq. Biz bunu istəmirik. Əgər “Azərsun” bir iş görürsə, mütləq keyfiyyətli olmalıdır. Marketlərin tərtibatı, xidmət və içərisində satılan məhsullar da keyfiyyətli olacaqdır. Biz bu ilin sonuna qədər 50 “Sərfəli” market açmağı planlaşdırırıq. Növbəti ildə say daha da artırılacadır”.

Savaş Uzan əlavə edib ki, bu gün Azərbaycanda istehlakçılar daha çox diskount marketlərə üstünlük verirlər.

Qeyd edək ki, endirim mağazası (Discount market) uzun zamandır istifadə edilən pərakəndə ticarət modelidir. Bu mağazalar ana prospektlərdə və ya icarə haqlarının yüksək olduğu ünvanlarda yerləşmirlər. Belə marketlərə məhəllə marektləri də demək olar. Endirim mağazalarında geniş tanınmamış markaların məhsullarının satılmasına üstünlük verilir.

İlk “Sərfəli” Market Bakıda “Olimpik Star”ın yaxınlığında istifadəyə verilib.