Uzun sürən ağır xəstəlikdən sonra tanınmış məşqçi Sakit Alıyev bu gün vəfat edib. Azərbaycan milli komandasının sabiq müdafiəçisi, ilk dəfə avrokuboklarda mübarizə aparan "Turan" komandasının kapitanı 49 yaşında haqq dünyasına qovuşub. Futbolçu kimi “Turan” və “Kəpəz”də ölkə çempionu olmuş Alıyev, həmçinin Tovuz klubunun heyətində milli çempionatın gümüş və bürünc medallarını qazanıb. Oyunçu karyerasını bitirdikdən sonra doğma komandasında məşqçiliyə başlayan Sakit Alıyev baş məşqçi vəzifəsinə kimi yüksəlib. 2011-ci ilin mayında məşq zamanı insult keçirən mütəxəssis İran, Rusiya və Gürcüstanda müalicə olunsa da, səhhətində müsbətə doğru dəyişiklik baş verməyib. O, doğulduğu Tovuz rayonunda dəfn edilib.

Nizami Sadıqov- "Turan Tovuz" klubunun baş məşqçisi: “Azərbaycan və Tovuz futbolu üçün belə bir şəxsiyyətin itkisi ağırdır. Ailəsinə dərin hüznlə başsağlığı veririk. Dostumuzu itirmişik, deməyə sözümüz də yoxdur. Onu, xüsusən də belə tez itirmək üzücüdür”.

Eltay Aslanov- veteran futbolçu: “Mən Sakit Alıyevlə həm futbol oynamışam, həm də məşqçim olub. Xoş xatirələri qalıb. Danışmaq çox ağırdır, danışa bilmirəm”.

11:28 olan xəbər

Uzun sürən xəstəlikdən sonra dünyasını dəyişmiş sabiq futbolçu və məşqçi Sakit Alıyev bu gün saat 14:00-da Tovuzun Bozalqanlı kənd qəbiristanlığında dəfn olunacaq. S.Alıyevin bu gün saat 7:00 radələrində 50 yaşında ikən dünyasını dəyişdiyi bildirir.

Veteran futbolçunun ölümünə 2011-ci ilin mayında oyun zamanı keçirdiyi insult səbəb olub. Sonradan o, İran, Rusiya və Gürcüstanda müalicə olunsa da, səhhətində müsbətə doğru heç bir dəyişiklik baş verməyib. Veteran futbolçunun nitqində və yaddaşındakı problem get-gedə böyüyüb: "Bu gün səhər uşağı qapının ağzında yerə yıxılıb. Bunu eşidən Sakit çölə çıxıb və o da qəfildən yerə sərilib. Bizə zəng edib dedilər ki, Sakitin vəziyyəti pisdir. Özümüzü çatdıranda gördük ki, təcili yardım maşını evlərinin qarşısındadır. Həkimlərin müdaxiləsinə baxmayaraq, onu həyata qaytarmaq mümkün olmadı".

Qeyd edək ki, Sakit Alıyev 1965-ci il dekabrın 22-də Tovuzda anadan olub. O, futbolçu karyerasına 1992-ci ildə "Turan"da başlayıb. 1997-ci ildə "Kəpəz"ə keçsə də, bir il sonra Tovuz komandasına qayıdıb və karyerasını başa vurduğu 2004-cü ilədək orada çıxış edib. 2005-ci ildə isə S.Alıyev "Turan"da baş məşqçi Naci Şensoyun köməkçisi kimi fəaliyyətə başlayıb. 2006-cı ilin yanvarından etibarən o, qısa fasilələrlə komandada baş məşqçi və məşqçi kimi çalışıb. 2011-ci ilin mayında məşq zamanı insult keçirən mütəxəssis yerə yıxılıb. Həmin vaxtdan o, daim həkim nəzarətində olub. S.Alıyev futbolçu kimi 1994-cü ildə "Turan"la, 1998-ci ildə isə "Kəpəz"lə ölkə çempionu olub. 1995-ci ildə Tovuz komandası ilə gümüş, 1992 və 1993-cü illərdə bürünc medal qazanıb.

http://kepeztv.az/