Onun otağına çardaqdan girən şəxslər qapı ilə əlaqəli qumbara quraşdırıb.

Zaqatalanın Əliabad qəsəbəsində polis sahə müvəkkilinin iş otağında partlayış baş verib. Bazar ərazisində yerləşən binada baş verən partlayış nəticəsində polis əməkdaşı çoxsaylı qəlpə yaraları alıb.
Hadisə Zaqatala Rayon Polis Şöbəsinin Əliabad qəsəbəsində yerləşən polis sahə müvəkkilinin iş otağında qeydə alınıb. Ərazidə olan sakinlərin dediyinə görə, Əliabad qəsəbəsində sahə müvəkkili işləyən polis kapitanı Rövşən Balıyev səhər saatlarında iş otağının qapısını açıb içəri daxil olmaq istəyən zaman qəflətən partlayış baş verib.
Hadisə nəticəsində sahə müvəkkili ağır xəsarətlər alıb. Sahə müvəkkilinin hadisə baş verən otağı isə yararsız hala düşüb. Çoxlu sayda qəlpə yaraları alan sahə müvəkkili 45 yaşlı Pövşən Balıyev dərhal xəstəxanaya çatdırılıb.
Hadisə bazar ərazisində baş verdiyindən həmin vaxt ətrafda çoxlu sayda adamlar olsa da sahə müvəkkilindən başqa xəsarət alan olmayıb.
İlkin ehtimallara görə, sahə müvəkkilinə məxsus otağın çardaq hissəsindən keçib tavandan dəlik açılaraq içəri otaqda əl qumbarası yerləşdirilib. Qurğu giriş qapısı ilə əlaqələndirildiyindən sahə müvəkkili otağa daxil olmaq istəyərkən partlayış baş verib.

Zaqatala rayon xəstəxanasından bildirdilər ki, çoxsaylı qəlpə yaraları ilə daxil olan sahə müvəkkilinə ilkin yardımlar göstərilib qəlpələrin bir qismi bədənindən çıxarılıb. Lakin vəziyyəti nisbətən ağır olduğundan Bakı şəhərinə göndərilib.