Həftənin ilk günü ölkədə yenə ağır qəzalarla açılıb. Yenə ölüm və xəsarət xəbərləri gəlib. Hadisələrin əksəriyyətinə səbəbsə, avtomobillərin yüksək surətlə idarə edilməsidir.

Bakıda ölümlə nəticələnən yol qəzaları qeydə alınıb. Hadisələrin biri Nərimanov rayonunda baş verib. Rayonun Aşıq Molla Cümə küçəsində Bakı şəhər sakini Adıgözəl Ağayev idarə etdiyi “Toyota” markalı avtomobillə yolu keçən paytaxt sakini Bənövşə Məmmədovanı vurub. Yaralı ağır vəziyyətdə yaxınlıqda yerləşən xəstəxanalardan birinə aparılıb. Həkimlərin bütün müdaxiləsinə baxmayaraq, qadın orada keçinib. İlkin ehtimala görə, qəza sürücünün avtomobili yüksəsk surətlə idarə etməsi səbəbindən baş verib.
Ölümlə nəticələnən daha bir qəza isə Nəsimi rayonunda baş verib. Bakı şəhər sakini Kamil Xanəliyev idarə etdiyi “Volkswagen” markalı avtomobillə yolu keçən 40-45 yaşlı kişini vurub. Piyada aldığı xəsarətlərdən elə yerindəcə keçinib. Bu qəzaya da səbəb kimi avtomobilin surət həddinin aşılması göstərilir.

Paytaxtın Qaradağ rayonunda da yol qəzası qeydə alınıb. Bakı-Qazax yolunun 54-cü kilometrliyində "KamAZ" markalı yük avtomobili idarəetməni itirərək yolun kənarındakı dərəyə aşıb. Nəticədə avtomobilin sürücüsü xəsarət alıb və nəqliyyat vasitəsində sıxılmış vəziyyətdə qalıb. Hadisə yerinə FHN-in Xüsusi Riskli Xilasetmə Xidmətinin xilasediciləri cəlb edilib. Onların müdaxiləsi ilə sürücü avtomobildən çıxarılaraq yaxınlıqdakı xəstəxanalardan birinə göndərilib. Həkimlər yaralının vəziyyətinin ağır olduğunu bildirir.
Bakının Nizami rayonunda restoranlardan birinin qarşısında da yol-nəqliyyat hadisəsi baş verib. Avtoqəza zamanı SOCAR-a məxsus avtobusla minik avtomobili toqquşub. Qəza nəticəsində bir nəfər ölüb, bir neçə nəfər xəsarət alıb. Hadisə zamanı minik avtomobili tamamilə yararsız hala düşüb. Zərbənin təsirindən minik avtomobilinin arxa oturacağı yerindən çıxıb, avtomobilin ön hissəsi deformasiyaya uğrayıb.

Abşeronda isə avtomobil traktora çırpılıb. Hadisə Xırdalan şəhəri, Heydər Əliyev prospektində qeydə alınıb. Prospektlə hərəkətdə olan “QAZ-3110” markalı minik avtomobili qarşıda, yol kənarında dayanan bələdiyyəyə məxsus qoşqulu traktoru arxadan vurub. Qəza zamanı minik avtomobili və traktorun qoşqusu yararsız hala düşüb. Hadisə yerinə yol patrul xidmətinin əməkdaşları çağırılıb. İlkin ehtimala görə, qəza minik avtomobilinin yüksək surətlə idarə olunması səbəbindən baş verib.

kepeztv/az