Kiçik çavuş I Qarabağ müharibəsində şəhid olan əmisinin məzarının yanında dəfn edildi.

22 yaşlı Elmir Zeynalovun cənazəsi doğulduğu Goranboy rayonunun Əhmədoba kəndinə gətirilib. ANS PRESS-in məlumatına görə, şəhidin tabutu kənd qəbristanlığına döyüş yoldaşlarının çiynində aparılıb.



Ailənin yeganə oğlu olan Elmir I Qarabağ müharibəsi zamanı şəhid olan əmisi İman Zeynalovun məzarının yanında dəfn edildi. Tabutun üzərinə salınmış üç rəngli bayraq şəhidin atası Sərxan Zeynalova təqdim edildi.
"Qardaşım da şəhid olub, indi də oğlum rəhmətə getdi. İkisi də onların Vətən yolunda gedib. Mən fəxr edirəm ki, onlar özlərini Vətənə qurban veriblər!"- deyə şəhidin atası bildirib.
Dəfn mərasiminin sonunda şəhidin ruhuna ehtiram əlaməti olaraq hərbi orkestrin müşayəti ilə havaya yaylım atəşi açıldı.
Müdafiə Nazirliyinin məlumatına görə, Ermənistan silahlı qüvvələrinin kəşfiyyat-təxribat qrupları qoşunların təmas xəttinin müxtəlif yerlərində mövqelərimizə basqın etməyə cəhd göstəriblər. Baş verən toqquşmada Ermənistan silahlı quvvələri 7 nəfər itki verib.