Azərbaycan Respublikasının Samux rayonu.
1992-ci ildə yaradılıb. Cəmi 31 yaşı var. Amma, bu rayon gənc yaşında nələr yaşayır onu bir Allah bilir, bir də sakinləri.

31 yaşlı rayona 21 ildir Alı Qocayev rəhbərlik edir.

Amma, yerli sakinlərin narazılıqlarında belə anlaşılır ki, Qocayev rayonun yalnız gəlirli sahələrinə (torpaq, təsərrüfat və sair) rəhbərlik edir. Problemlərə isə rəhbərlik edən bir kimsə yoxdur.

Məhz elə buna görədir ki, gah rayonun özündən, gah Sərkar qəsəbəsindən, gah Nəbiağalı, gah da Qarayeri qəsəbəsindən "çeşid-çeşid" narazılıqlar gəlməkdə davam edir.

Əslində biz Sərkar sakini Anar Mammadovun pay torpaq iddiası, İcra başçısının və yerli bələdiyyə sədri Şəmistan Yusifovun onu döydürdüyü iddiası, Nəbiağalının yol problemi, meşə zolaqlarının məhv edilib, pay torpaq sahəsi kimi satılması , kəndin içində sözün əsl mənasında böyük bir zibilliyin olması və sair barəsində qarşı tərəflərin bəzilərinin mövqeyini dinləmək şərtilə bir neçə dəfə məlumatlar yayımlamışıq.

Təbii ki, qarşı tərəfin də verdiyi cavab heç bir səlahiyyətə sahib olmayan vətəndaşı günahkar çıxarmaq olub. Necə deyərlər, onların dediklərini cavab yox, "qeybət" adlandırmaq daha doğru olar.

Əlqərəz...

Bu dəfə isə Qarayeri qəsəbə sakini Əjdər Məmmədov "DogruXeber.az"a müraciət edərək, qəsəbə yollarının bərbad halda olmasından gileylənib.

Əjdər Məmmədov bildirir ki, "İllərdir qəsəbənin yolları bərbad vəziyyətdədir. Azca yağış yağanda küçələrdə hərəkət iflic olur. Avtomobil üçün zatən yollar keçilməz vəziyyətdədir. Çünki, yollardakı çala-çuxurla avtomobilin hərəkəti mümkünsüzdür, azca yağış olan kimi də palçıq "dizə çıxır" piyada hərəkəti də iflic olur. Uşaqlarımız məktəbə getməkdə çətinlik çəkirlər. Dəfələrlə bu barədə yerli bələdiyyəyə, rayon icra hakimiyyətinə müraciət etmişik, amma görünür Qarayeri sakinlərinin problemi onları narahat etmir ki, illərdir zərrə qədər reaksiya verilmir ".

Belə olan halda adamı maraq götürür.

Əvvəla təkrar xatırladaq ki, qeyri-rəsmi də olsa da yerlərdə fəaliyyət göstərən bütün idarə və təşkilatlar yerli icra hakimiyyətinin el dilində desək "ağzına baxır". İcra başçısının ağzından çıxan əmri dərhal yerinə yetirmək üçün səfərbər olurlar. Bəs bu saçını İcra başçısı kürsüsündə ağardan 75 yaşlı Qocayev xidmət etməli olduğu halda ağalıq etdiyi rayonun problemlərinə niyə biganə yanaşır?
Hər halda səbəb təcrübəsizlik deyil.

Halbuki, bir kəlməsi bəs edər ki, ən azından həmin yollara xırda çay daşları döşənsin.

Gözləyək görək, bəlkə bundan sonra rayon rəhbərliyindən hər hansı bir hərəkət ola.
Əgər olarsa, biz obyektiv olaraq, görülən işləri də yayımlayacağıq.

Redaksiyamız hər kəsin söz haqqını tanıyır.

DogruXeber.az