Daxili İşlər Nazirliyi Mətbuat Xidmətinin şöbə rəisi Orxan Mansurzadə "Yeni Müsavat" qəzetində çap olunan yazıya reaksiya verib.

Orxan Mansurzadənin musavat.com-a göndərdiyi açıqlamanı olduğu kimi diqqətinizə çatdırırıq: "Yeni Müsavat" qəzetinin 23 noyabr 2015-ci il tarixli sayında dərc olunmuş “Məni vəhşicəsinə döydülər ki, saxta sənədlərə qol çəkim” başlıqlı yazıda məhkəmə qarşısına çıxarılan Sumqayıt şəhər sakini Mehman Məmmədovun istintaq prosesində ona qarşı guya haqslzlıqlar edilməsi, ədalətli araşdırma aparılmadığı barədə səsləndirdiyi iddiaların heç bir hüquqi əsası yoxdur və bu, özünümdafiə taktikası kimi sözügedən şəxsin təqsirsizliyi barədə ictimai rəyin yaradılmasına xidmət edir.

İndi haqdan-ədalətdən dəm vuran, guya günahsız yerə məhkum olunacağından şikayətlənən bu şəxsin törətdiyi cinayət əməlləri Sumqayıt şəhər sakini Gülverdi Ağaverdiyevin H.Zeynalabdin qəsəbəsi Dəmir Yol yaşayış massivi ərazisində yerləşən ərzaq mağazasından 5.11.2014-cü il tarixdə törədilmiş oğurluq faktı üzrə Şəhər Polis İdarəsinin İstintaq Şöbəsində CM-nin müvafiq maddələri ilə başlanmış cinayət işinin istintaqı zamanı üzə çıxıb.

Müəyyən olunub ki, Sumqayıt şəhər sakini Elxan Şahbazov qohumu Vüsal Məmmədov və tanışı Mehman Məmmədov ilə qabaqcadan cinayət əlaqəsinə girərək özgənin əmlakını gizli yolla talamaq məqsədi ilə G.Ağaverdiyevə məxsus mağazadan təqribən 1500 manat dəyərində oğurluq ediblər.

Mehman Məmmədovun da daxil olduğu məlum cinayətkar qrup keçən il və bu ilin əvvəllərində Sumqayıt şəhəri ilə yanaşı respublikanın Siyəzən, Şabran rayonlarında da serial oğurluqlar törədib və həmin faktlar üzrə qaldırılan cinayət işləri bir icraatda birləşdirilib.

Maraqlıdır ki, indi günahsızlığını iddia edən, əvvəllər iki dəfə CM-in eyni maddəsi ilə məhkum edilən, sonuncu oğurluğa görə məntəqə tipli cəzaçəkmə müəssisəsində cəzasını çəkən M.Məmmədov artıq üçüncü dəfə eyni aqibəti yaşamalı olacaq. M.Məmmədovun iddialarının əksisnə olaraq, adları çəkilən şəxslərin törətdikləri cinayət əməlləri istintaq zamanı tam sübuta yetirilib. Artıq istintaq başa çatdırılaraq cinayət işi baxılması üçün Sumqayıt şəhər Məhkəməsinə göndərilib”.

http://musavat.com