"Lisenziya nədir? Pul mənbəyidir. Qanunsuz varlanma metodudur."

“Yerli icra hakimiyyəti orqanları, o cümlədən hüquq mühafizə orqanları bəzi hallarda sahibkarlara problemlər yaradırlar, bəzi hallarda onlardan pul tələb edirlər. Sahibkar heç kimə - nə yerli icra orqanlarının, nə də hüquq mühafizə orqanlarının nümayəndələrinə borclu deyil, ancaq dövlətin vergisini verməlidir, vəssalam. Sahibkarları boğurlar, soyurlar, incidirlər. Bu, dözülməz haldır.”

ANS PRESS-in məlumatına görə, bu sözləri prezident İlham Əliyev Nazirlər Kabinetinin doqquz ayının yekunlarına həsr olunan iclasında deyib.

Yerli icra orqanlarının səbəbsiz yoxlamalarına münasibət bildirən İlham Əliyev bildirib ki, sahibkarlar bu hallarla çox rastlaşır. Yoxlamaların sayı kifayət qədər çoxdur, yoxlayan təşkilatlar da sanki bir-biri ilə rəqabətə çıxıblar. Prezident bildirib ki, yoxlamaların böyük əksəriyyətinin arxasında yenə də maddi təmənna dayanır.

“Yoxlayan gəlir, nəyi yoxlayır, nəyi yoxlamır, ancaq nəticə etibarilə öz payını alır, çıxıb gedir. Budur reallıq. Bu, heç kim üçün sirr deyil. Buna da son qoyulmalıdır. Ona görə, qısa müddət ərzində mənə yoxlamalarla bağlı müfəssəl məlumat verilsin, hansı qurumlar kimi yoxlayırlar, ildə neçə dəfə yoxlayırlar, nə üçün yoxlayırlar? Burada bir sistem olmalıdır.”

İlham Əliyev yoxlamaların tənzimlənmə mexanizmi işlənməli olduğunu deyib. “Burada müəyyən şərtlər qoyulmalıdır – kim, nə vaxt, hansı müddət ərzində kimi yoxlaya bilər? Ümumiyyətlə, biz bu yoxlamaların sayını kəskin şəkildə aşağı salmalıyıq.”
Prezident son vaxtlar bağlanan iş yerləri məsələsinə də münasibət bildirib. Onun sözlərinə görə, iş yerlərinin bağlanma səbəbləri araşdırılıb, təhlil edilməlidir.

“30 minə yaxın iş yeri bağlanıb. 67 min daimi iş yeri yaradılıb, Bax, bunun təhlilini aparmaq lazımdır. Mənə məlumat verilsin ki, o iş yerləri hansı səbəblər üzündən bağlanıb. O müəssisələrin rəhbərlərini dəvət etmək, soruşmaq lazımdır. Buna son qoyulmalıdır.”
İlham Əliyev məmurlar qanunsuz varlanmaq üçün lisenziyaların sayını süni yolarla artırdıqlarını deyib. Prezident hansı lisenziyaların verilməli olduğu ilə bağlı hökumətin təkliflər verməli olduğunu bildirib.

“O əsaslıdır, əsaslı deyil və o lisenziyaların sayı kəskin şəkildə azaldılmalıdır. Mənə verilən məlumata görə, lisenziyaların sayı getdikcə artır. Əksinə, azalmalıdır, amma bizdə artır. Nəyə görə? Çünki müvafiq qurumlar çalışırlar ki, lisenziyaların sayını artırsınlar. Lisenziya da nədir? Pul mənbəyidir. Qanunsuz varlanma metodudur.”

Prezident ölkədə inkişafın uğurla getdiyini amma bu inkişafın daha da sürətli getməsinin qarşısını alan maneələr kimi rüşvətxorluq, korrupsiya, yoxlamalar, lisenziyalar, haqqoymaları göstərib. Onun sözələrinə görə əgər bu hallar olamasaydı büdcəmiz indikindən daha yüksək olardı.

İlham Əliyev iqtisadiyyat üçün əsas problemlərdən birinin də inhisarçılıq olduğunu deyib. Biz inhisarçılıq sahəsində həm istehsalda, həm də idxalda hələ ciddi nəticələrə nail ola bilməmişik.

“Burada da, bilmirəm bu nə psixologiyadır ki, düşünürlər, əgər mən bu məhsulu istehsal edirəmsə, başqası gərək istehsal etməsin. Başqasına da imkan vermək lazımdır ki, rəqabət olsun. Rəqabət olmasa, inkişaf da olmaz, keyfiyyətli məhsullar da olmaz. Qoy, hər kəs istehsal etsin. Yaxşı, bazarımız ola bilər ki, kifayət qədər məhduddur. Elə məhsullar yetişdirin, istehsal edin ki, xaricə sata biləsiniz.”

İlham Əliyev bildirib ki, bizim gələcəkdə iqtisadiyyatımızın inkişafını təmin edən əsas sahə ixrac olacaq.

Prezident iyulun 13-də Nazirlər Kabinetinin iclasında da sahibkarlara yaradılan süni əngəllərə və vergi orqanlarının fəaliyyətininə iradlarını bildirirmişdi.
“Ölkəmiz sahibkarlıq hesabına inkişaf edəcək. Di gəl ki, kimsə varlanmaq üçün gəlsin sahibkarları boğsun ki, sahibkar qapısına qıfıl vurub çıxıb getsin. Bu, dözülməz haldır. Yəni, bunu edən dövlətə xəyanət edir. Bunu edən, sadəcə olaraq, pul qazanmır, dövlətə xəyanət edir. Mən bunu belə qəbul edirəm və hamı bunu bilsin və nəticə çıxarsın. Ancaq heç bir başqa əsassız tələb irəli sürülməməlidir.”,-deyə Prezident İlham Əliyev bildirib.

Prezident bildirmişdi ki, sahibkarlara ayrılan pullun 100 faizi onlara çatmalıdır. “Ondan başqa, heç kimə 1 manat verməməlidirlər. Bax, mən onlara tapşırıram və göstəriş verirəm. Eyni zamanda, dövlət qurumlarına çox ciddi göstəriş verirəm ki, heç bir əsassız tələb irəli sürülməməlidir. Əfsuslar olsun ki, belə hallar var. Vergilər Nazirliyi, hüquq mühafizə orqanları, yerli icra hakimiyyətləri Bakıda və rayonlarda haqq qoyurlar, pay istəyirlər, “krışalıq” edirlər. Bu, dözülməz haldır, buna son qoyulmalıdır.”