Qarabağ qazisi, məcburi köçkün olan Vüqar Əliyev 20 ildən artıqdır ki, Bakı Dövlət Universitetinin tələbə yataqxanasında çox çətin şəraitdə yaşayır. Ailəsi ilə birlikdə şəraitsiz, uçuq-sökük yataqxanada yaşayan Vüqar Əliyev artıq bu vəziyyətə dözə bilmədiklərini deyir.

Bununla bağlı musavat.com-a danışan Qarabağ qazisi deyir ki, dəfələrlə məcburi köçkünlərə evlər paylanarkən onun ailəsinə ev verilməyib: “22 ilə yaxındır ki, yataqxanalarda yaşayıram. Dəfələrlə mənə ev verilməsi ilə bağlı "Qaçqınkom"a müraciət etmişəm. Lakin müraciətimə baxan yoxdur. Ümumilikdə yataqxanalarda yaşayan məcburi köçkünlərdən 700 ailə mənzillə təmin olunub. Yaşadığım 8 saylı tələbə yataqxanasında, 9 mərtəbəli binada yaşayan məcburi köçkünləri köçürdülər. Bizə isə mənzil verilmədi. Cəmi 9 ailə qalmışıq”.

Vüqar Əliyevin həyat yoldaşı Sevil Əliyeva da deyir ki, adları mənzil qeydiyyatında olsa da, hələ də mənzillə təmin olunmayıblar: “Məcburi köçkünləri mənzillə təmin etmək üçün qeydiyyata almağa gəlmişdilər. Həmin vaxt mən də orada idim. Evlər verilərkən mənim adım mənzil qeydiyyatında olan siyahıdan çıxmadı”.

Sevil Əliyeva yataqxanadakı şəraitsizlikdən də şikayət etdi: “İllərdir ki, şəraitsizlikdən əziyyət çəkirik.Yataqxanaya su gəlmir. Bir stəkan suya möhtac oluruq. Suyu həyətdən vedrələrlə daşıyırıq. 2 ildir ki, 8 saylı yataqxanada yaşayırıq. Qaz, işıq, su üzünə həsrət qalmışıq. Yataqxana qəzalı vəziyyətdədir. Toz-torpaq içində batırıq. Hər tərəf uçuq-sökük vəziyyətdədir. Uşaqlar da böyüyüb. Balaca otaqlarda yaşamaq çətindir. Rütubətli, dar otaqlarda uşaqlar xəstəlik tapıb. Böyük oğlumda nəfəs çatışmazlığı var. Müalicə olunmalıdır. "Qaçqınkom" bizi buraya köçürəndə dedilər ki, narahat olmayın sizi mənzillə təmin edəcəyik. “Qaçqınkom"un sədri Əli Həsənovdan xahiş edirəm ki, başqalarını yeni mənzillə təmin etdikləri kmi, bizi də sevindirsin”.

Qarabağ qazisinin mənzil problemi ilə bağlı Qaçqın və Məcburi Köçkünlərin İşləri üzrə Dövlət Komitəsinin mətbuat xidmətinin rəhbəri Elçin Qədimovla əlaqə saxladıq. Qurumdan bizə bildirildi ki, məsələ ən qısa zamanda araşdırılıb, lazımi məlumat veriləcək.

Mövzunu diqqətdə saxlayacağıq.

musavat.com