Bu ilin 19 may tarixində Binəqədi rayonunda çoxmərtəbəli binada baş verən yanğın zamanı evləri ilə birlikdə əşyaları da yanan sakinlər Bakı şəhər İcra Hakimiyyətindən narazıdırlar. Sakinlər musavat.com-a bildiriblər ki, onlara yanğından sonra 20 min manat kompensasiya və mebel verilsə də, bir çox əşyalarla təmin olunmayıblar. Sakin Səbinə Manafova bildirb ki, Bakı şəhərinin meri Hacıbala Abutalıbov onlara verdiyi sözü tutmayıb:

“Bizə şəxsən Hacıbala müəllim özü söz verdi ki, sakinlərin bütün problemləri yüksək səviyyədə həll olunacaq. Ancaq belə olmadı. Onlar bu binada yaşayan heç bir sakinə məişət əşyalarının əksəriyyətini vermədilər. Bizim soyuducumuz, kondisonerimiz, xalçalarımız, televizorumuz, komputerimiz və digər bu kimi məişət əşyalarımız yanıb. Onların heç biri müvafiq qurumlar tərəfindən alınıb bizə verilmədi. Dəfələrlə icra hakimiyyətinə müraciət etsək də, heç bir xeyiri yoxdur”.

Sakin iddia edir ki, onları aldadıblar: “Binanın təmiri zamanı bir mənzilin iki otağını bəzəyib bizi çağırdılar ki, sizin ev də bu cür olacaq. Həmin mənzildə bütün məişət əşyaları var idi. Hətta kondisoner də quraşdırılmışdı. Ancaq sonradan o mənzildəki əşyaları da çıxarıb apardılar. Bizim də mənzillərimizə sadalağım əşyalar verilmədi. Hətta bir məqamı da qeyd edim ki, bina təzə təmir olunan zaman burada olduqca səriştəsiz ustalar işlədirdilər. Sonra mən yenidən prezidentə, birinci xanım Mehriban Əliyevaya məktublar yazdım. Ondan sonra yeni briqada gəlib təmirə başladı. Bütün sakinlər aparılan təmirdən, bizə göstərilən xidmətdən narazıdırlar”.

Qeyd edək ki, bu gün yanan binanın qarşısında həmçinin avtomobillərinə və obyektlərinə ciddi zərər dəymiş şəxslər də aksiya keçirdilər. Onlar dəymiş zərərin müqabilində dövlət tərəfindən ayrılan kompensasiyanı tələb etdilər.

musavat.com