“Göstəriş Nuşirəvan müəıllimdən gəlib”

Yol polisi paytaxtda olan rayon qeydiyyatlı maşınları saxlayaraq cərimələyir. Bu barədə müsavat.com-a rayon qeydiyyatında olan avtomobillərin sürücüləri məlumat verib.

Rayonlardan birindən Bakıya iş dalınca gəlmiş Quliyev Kəyan bildirib ki, qaydalara uyğun olaraq şəhərə icazə verilən saatlarda daxil olub, ancaq gündüz saatlarında yol polisi metronun “20 yanvar” stansiyası yaxınlığında onu və digər rayon qeydiyyatlı avtomobilləri saxlayaraq 3-cü mikrorayon dairəsi ərazisində yerləşən cərimə meydançasına aparıb.

Şikayətçi deyir ki, yol polisinə müvafiq hökumət qərarında şəhər daxilində rayon qeydiyyatlı maşınların hərəkətinə hər hansı məhdudiyyət qoyulmadığını xatırlatsa da, Fizuli adlı polis əməkdaşı bildirib ki, bu barədə Nuşirəvan (yəqin ki, Bakı Baş Dövlət Yol Polisi İdarəsinin rəisi Nuşirəvan Səfərov nəzərdə tutulur – K.) qərar verib.

Açığı belə bir qaydanın olmasından şübhələndiyimiz üçün Bakı şəhər Baş Polis İdarəsi Dövlət Yol Polisi İdarəsinin İctimai qurumlarla əlaqə bölməsinin rəisi, polis polkovnik-leytenantı Vaqif Əsədovla əlaqə saxladıq. Ancaq V.Əsədov belə bir qərardan xəbəri olmadığını, öyrənəcəyini deyərək telefonu qapatdı.

Ancaq mütəxəssislər bildirdilər ki, paytaxt ərazisində rayon qeydiyyat nişanlı avtomobillərin saxlanılması qanunsuzdur.

Yol polisinin mövqeyini, izahatını dinləməyə, çap etməyə hazırıq.