BMT Baş Məclisinin 1992-ci ildə qəbul etdiyi "Ahılların müdafiəsi ilə bağlı Qətnamə"yə əsasən təsis edilən Beynəlxalq Ahıllar Günü 1993-cü ildən başlayaraq Azərbaycanda da hər il qeyd olunur.

Əmək və Əhalinin Sosial Müdafiəsi Nazirliyinin yaydığı statistikaya əsasən, hazırda Azərbaycanda 12 569 nəfərdən çox vətəndaşa evlərində sosial-məişət xidməti göstərilir ki, onlardan 10 251 nəfərdən çoxu 70 yaşdan yuxarı olanlardır. Bundan başqa, nazirliyin tabeliyində olan sosial xidmət müəssisələrində 200 nəfərədək ahıl tam dövlət təminatında yaşayır.
Bu ilin sentyabrın 30-a olan statistikaya əsasən, Dövlət Sosial Müdafiə Fondunda (DSMF) qeydiyyatda olan əmək pensiyaçılarının 335 506 nəfəri ahıl vətəndaşlardır. Onlardan 203 526 nəfəri qadın, 131 980 nəfəri isə kişidir. Ahıl pensiyaçıların 246 868 nəfəri 70-80 yaş arası, 81 414 nəfəri 80-90 yaş arası, 7224 nəfəri 90-dan artıq yaşı olan vətəndaşlardır.Hazırda bu qəbildən olan vətəndaşların yaşa görə əmək pensiyalarının orta aylıq məbləği 194,4 manat təşkil edir.
Qeyd edək ki, "Sosial xidmət haqqında" qanuna əsasən, ölkədə 70 yaşına çatan vətəndaşlar ahıl hesab olunurlar.