Bakı şəhərinin hər hər yerində quruculuq, abadlıq, hərəkətin nizama salınması, küçə alverinə qarşı mübarizə davam etdiyi bir vaxtda bütün bunlar Nizami rayonunda gözə çarpmır.

Belə ki, Səkkizinci kilometr bazarı adlanan ərazidə küçə tamamilə satıcılar tərəfindən bağlanıb, hətta insanların, nəqliyyatın hərəkət etdiyi küçəyə yerüstü elektrik xətti çəkilməklə soyuducu və başqa qurğular da qoyulub. Hər hansı bir hadisə zamanı buradan nə polis, təcili yardım, nə də yanğın söndürən maşınlar da keçə bilməz. Ərazi zibil tullantıları ilə doludur, ərzaq və yeyinti məhsulları küçədə yerin üstündə qoyulub satılır. Bütün bunlar polisin, sanitar stansiyası, icra hakimiyyəti orqanları işçilərinin gözü önündə həyata keçirilir. Deyilənə görə, küçə alverinə polis icazə verir. Hər bir satıcının gündəlik yeri məlumdur. Polis hətta küçəni dəmir boru vasitəsilə bağlayır. Axı küçəni yol inşaatı səbəbi ilə bağlamaq olar. Daxili Işlər Nazirliyinin hər dörd tərəfindən nəqliyyat yolu açıqdır. Görünür Nizami Polis Idarəsinin qarşısından keçən Şirin Mirzəyev küçəsi rəis tərəfindən bağlanır ki, keçən maşın səsi polis əməkdaşlarını narahat etməsin. Bütün bunlar insanların haqlı narazılığına səbəb olur. Güman edirəm ki, rayona yeni təyin edilmiş hörmətli başçı lazımi tədbir görəcəkdir.